इगतपुरीनामा न्यूज – इगतपुरी तालुक्यातील नागोसली ग्रामपंचायतीचे उपसरपंच अशोक दत्तू शिंदे यांच्याविरोधात करण्यात आलेला अपात्रतेचा दावा नाशिकच्या अप्पर जिल्हाधिकारी हेमांगी पाटील यांनी फेटाळून लावला आहे. त्यामुळे अशोक शिंदे यांचे उपसरपंच व ग्रामपंचायत सदस्यपद कायम राहणार आहे. शासकीय जागेवर अतिक्रमण केल्याचा आरोप करत तक्रारदार भगवान वामन गोजरे यांनी अशोक शिंदे यांना ग्रामपंचायत सदस्य आणि उपसरपंच पदावरून अपात्र ठरविण्याबाबत दावा दाखल केला होता. या प्रकरणी नाशिकच्या अप्पर जिल्हाधिकारी कार्यालयामार्फत सविस्तर चौकशी करण्यात आली. दोन्ही पक्षकारांना आपली बाजू मांडण्याची व पुरावे सादर करण्याची संपूर्ण संधी देण्यात आली. सत्य परेशान होता है… पराजित नही अशी प्रतिक्रिया सरपंच काशिनाथ सक्रू होले, ग्रामपंचायत सदस्य सुरेश धापटे यांनी व्यक्त केली. सुनावणीदरम्यान सादर करण्यात आलेली कागदपत्रे, चौकशी अहवाल व पुराव्यांच्या आधारे अशोक शिंदे यांनी शासकीय जागेवर अतिक्रमण केल्याचे सिद्ध झाले नाही. म्हणून अपात्रतेची तक्रार फेटाळला असल्याचा निर्णय अप्पर जिल्हाधिकारी हेमांगी पाटील यांनी दिला.
निर्णयानंतर प्रतिक्रिया देताना अशोक शिंदे म्हणाले की, “माझ्याविरोधात करण्यात आलेली तक्रार ही राजकीय हेतूने प्रेरित होती. मात्र सत्याचा विजय झाला असून न्यायदेवतेने योग्य न्याय दिला आहे. यापुढेही अधिक जोमाने नागोसली गावाच्या विकासासाठी काम करत राहणार आहे.” दरम्यान, निकालाची माहिती गावात पोहोचताच अशोक शिंदे यांच्या समर्थकांनी आनंद व्यक्त करत जल्लोष केला. फटाके फोडून आणि एकमेकांना शुभेच्छा देत समर्थकांनी निर्णयाचे स्वागत केले. नागोसली ग्रामपंचायतीतील राजकीय घडामोडींना या निकालामुळे नवे वळण मिळाले असून गावात या निर्णयाची चर्चा सुरू आहे. कऱ्होळेचे माजी सरपंच पांडुरंग खातळे, आवळी दुमालाचे माजी सरपंच रामदास जमधडे, भावलीचे सरपंच आकाश पाचरणे, धारगाव सरपंच रेश्मा पांडुरंग पुंजारा, धारगावचे ग्रामपंचायत सदस्य रंजन गोवर्धने, विश्वासराव खातळे, काशिनाथ खोडके, गणपत चौधरी, शंकर खातळे, कन्हैया असोपा, माजी सरपंच ज्ञानेश्वर जमधडे आणि इगतपुरी तालुक्यातून अभिनंदन करण्यात आले
