
इगतपुरीनामा न्यूज – नाशिक मुंबई महामार्गावरील इगतपुरीजवळ असलेल्या साई कुटीर निवास येथील निवारा शेडचा स्लॅब अचानक कोसळल्याने १७ साईभक्त जखमी झाल्याची घटना घडली. मंगळवारी रात्री १०.४५ च्या सुमारास शिर्डीला दर्शनासाठी जाणारे वाशिंद शहापूर येथील सुमारे ३०० साईभक्त जेवण आटोपून निवारा शेडमध्ये आराम करत असताना अचानक स्लॅबचे गर्डर आणि फरशा कोसळल्या. त्यामुळे विश्रांती घेत असलेले भाविक ढिगाऱ्याखाली दबले गेले. घटनेची माहिती मिळताच स्थानिक नगरसेवक, सामाजिक कार्यकर्ते, पोलीस आणि टोलनाक्यावरील कर्मचाऱ्यांनी तातडीने घटनास्थळी धाव घेतली. ढिगाऱ्याखाली अडकलेल्या जखमींना बाहेर काढून इगतपुरी ग्रामीण रुग्णालयात दाखल करण्यात आले. काही गंभीर जखमींना पुढील उपचारासाठी घोटी व नाशिक येथे हलविण्यात आले. सुदैवाने या दुर्घटनेत कोणतीही जीवितहानी झाली नसून सर्व जखमींवर उपचार सुरू आहेत.
या दुर्घटनेनंतर साई कुटीर निवास येथील निवारा शेडच्या बांधकामाबाबत अनेक प्रश्न उपस्थित होत आहेत. सदर ८ ते १० गुंठ्यात बांधण्यात आलेले निवारा शेड १७ वर्षांपूर्वी बांधण्यात आले आहे.
हे अनधिकृत असल्याची परिसरात चर्चा सुरू असून या बांधकामासाठी इगतपुरी नगरपरिषदेची अधिकृत परवानगी घेण्यात आली होती का, असा सवाल उपस्थित केला जात आहे. नगरपरिषद बांधकाम विभागाने या बांधकामाची परवानगी, मंजूर नकाशा आणि बांधकामाची तांत्रिक मान्यता तपासली होती का? बांधकाम करताना आवश्यक सुरक्षा नियमांचे पालन करण्यात आले होते का? तसेच बांधकामाची गुणवत्ता तपासण्यासाठी तांत्रिक पाहणी झाली होती का, असे प्रश्न आता पुढे येत आहेत. भाविकांच्या विश्रांतीसाठी उभारण्यात आलेल्या निवारा शेडची सुरक्षितता अत्यंत महत्त्वाची असताना अशा प्रकारे छत कोसळणे ही गंभीर बाब आहे. नगरपरिषदेने संबंधित बांधकामाची तातडीने पाहणी करून परवानगीची कागदपत्रे तपासावीत, बांधकामाच्या दर्जाची तांत्रिक चौकशी करावी आणि दोषी आढळणाऱ्यांवर कायदेशीर कारवाई करावी, अशी मागणी नागरिकांकडून होत आहे.