
इगतपुरीनामा न्यूज – महाराष्ट्र शासनाच्या कृषी विभागामार्फत केंद्र शासनाच्या वतीने इगतपुरी तालुक्यात २२ ऑक्टोबर ते ३० नोव्हेंबर या कालावधीत ‘खेत बचाव अभियान’ राबविण्यात येत आहे. इगतपुरी तालुक्यातील ३९ गावांमध्ये इगतपुरीचे तालुका कृषी अधिकारी रामदास मडके यांच्या मार्गदर्शनखाली अभियानांतर्गत शेतकरी मार्गदर्शन कार्यक्रम आयोजित करण्यात येणार आहेत. याचाच एक भाग म्हणून रामनगर येथे कार्यक्रम संपन्न झाला. केंद्रीय एकीकृत नाशिजीव प्रबंधन केंद्र, नाशिकचे सहाय्यक वनस्पती संरक्षण अधिकारी आनंद पाचरे यांनी शेतकऱ्यांना एकात्मिक कीड व्यवस्थापनाच्या विविध पद्धतींची माहिती दिली. बीज प्रक्रिया करण्याचे महत्त्व, योग्य कीटकनाशकांची निवड व त्यांचा सुरक्षित आणि संतुलित वापर, चिकट सापळ्यांची संख्या व वापरण्याची पद्धत, ट्रायकोकार्डचे फायदे, प्रकाश सापळ्यांचे महत्त्व तसेच मित्रकिडींची ओळख आणि संवर्धन याविषयी त्यांनी सविस्तर मार्गदर्शन केले. मंडळ कृषी अधिकारी संजय पाटील यांनी नानाजी देशमुख कृषी संजीवनी प्रकल्पांतर्गत वैयक्तिक लाभाच्या विविध योजनांची माहिती दिली. उपकृषी अधिकारी किशोर भरते यांनी गोपीनाथ मुंडे शेतकरी अपघात विमा योजनेची माहिती दिली.
सहायक कृषी अधिकारी विजय कापसे यांनी हरभरा बियाण्यांची बीज प्रक्रिया करण्याचे प्रात्यक्षिक सादर केले. यामध्ये ट्रायकोडर्मा आणि रायझोबियमचा योग्य प्रमाणात वापर कसा करावा, बीज प्रक्रियेचे फायदे कोणते, याची प्रत्यक्ष कृतीतून माहिती देण्यात आली.
कार्यक्रमास सहाय्यक वनस्पती संरक्षण अधिकारी आनंद पाचरे, मंडळ कृषी अधिकारी संजय पाटील, उपकृषी अधिकारी किशोर भरते, सहायक कृषी अधिकारी विजय कापसे, बायफ संस्थेचे संजय थेटे, दिपाली शेलार, प्रतीक भोर, वासाळीचे माजी सरपंच काशिनाथ कोरडे, तुकाराम मुठे, माजी पंचायत समिती सदस्य नंदू साबळे, पोलीस पाटील सिताराम कचरे, ग्रामपंचायत सदस्य भरत जाधव, कैलास जाखेरे, माजी ग्रामपंचायत सदस्य जनार्दन जडे यांच्यासह प्रगतिशील शेतकरी देवचंद मोठे, नामदेव झोले, यशवंत खादे, प्रकाश कोरडे, तानाजी केकरे, तानाजी कोरडे, भागुबाई केकरे, काशिनाथ कचरे, राजाराम कचरे, नारायण खादे आदी शेतकरी उपस्थित होते.