इगतपुरीनामा न्यूज – गॅस, पेट्रोल व डिझेलच्या वाढत्या किमतीमुळे सर्वसामान्य नागरिक, शेतकरी आणि वाहतूक क्षेत्रावर मोठा आर्थिक भार पडत आहे. त्यामुळे ही दरवाढ तात्काळ मागे घेण्यासाठी इगतपुरी त्र्यंबकेश्वर विधानसभेचे नेते लकीभाऊ जाधव, काँग्रेसचे इगतपुरी तालुकाध्यक्ष रामदास धांडे यांच्या नेतृत्वाखाली पेट्रोल पंपावर आंदोलन करण्यात आले. यावेळी सरकार विरोधात घोषणा देण्यात आल्या. यासह वाहनचालकांना मेलडी चॉकलेट वाटून निषेध नोंदवण्यात आला. यानंतर इगतपुरीच्या पोलीस निरीक्षक सारिका अहिरराव यांच्याकडे मागण्यांचे निवेदन देण्यात आले. निवेदनात म्हटले आहे की, मागील काही दिवसांत पेट्रोल व डिझेलच्या दरात प्रतिलिटर ८ रुपयांची वाढ करण्यात आली आहे. यामुळे आधीच महागाईने त्रस्त असलेल्या जनतेच्या अडचणीत आणखी भर पडली आहे. काँग्रेसने केंद्र सरकारच्या इंधन दरवाढीच्या धोरणावर टीका करतांना पेट्रोलियम उत्पादनांवरील कर व उपकरांमधून मोठ्या प्रमाणावर महसूल गोळा केला जात असल्याचा आरोप केला. पेट्रोल, डिझेल व गॅस सिलेंडरच्या वाढत्या किमतींमुळे जीवनावश्यक वस्तूंच्या दरात वाढ होत असून त्याचा थेट परिणाम सर्वसामान्य नागरिकांवर होत असल्याचे निवेदनात नमूद करण्यात आले आहे.
विशेषतः शेतकऱ्यांना शेतीकामासाठी ट्रॅक्टर व इतर यंत्रसामग्रीसाठी मोठ्या प्रमाणावर डिझेलची आवश्यकता असते. त्यामुळे डिझेल दरवाढीचा शेती उत्पादन खर्चावर थेट परिणाम होत असून वाहतूक खर्च वाढल्याने बाजारातील वस्तूंच्या किमतीही वाढत असल्याचे काँग्रेसच्या वतीने सांगण्यात आले.
राज्यातील अनेक भागांत इंधनटंचाईची परिस्थिती निर्माण होत असल्याने शेतीची कामे खोळंबण्याची शक्यता व्यक्त करण्यात आली आहे. यामुळे अन्नधान्य उत्पादनावर परिणाम होऊन महागाई आणखी वाढू शकते, असा इशाराही निवेदनात देण्यात आला आहे.
या पार्श्वभूमीवर शासनाने तात्काळ हस्तक्षेप करून पेट्रोल व डिझेल दरवाढ मागे घ्यावी, इंधन पुरवठा सुरळीत करण्यासाठी आवश्यक उपाययोजना कराव्यात, अशी मागणी इगतपुरी तालुका काँग्रेस पदाधिकारी व कार्यकर्त्यांनी केली आहे. यावेळी आकाश पारख, ओबीसी सेल तालुका कार्याध्यक्ष मल्हारी गटखळ, सेवा दल तालुकाध्यक्ष शिवाजी शिंदे, गणेश मेदडे, निवृत्ती कातोरे, मारुती चव्हाण, रामदास सोनवणे, महिला अल्पसंख्याक जिल्हाध्यक्ष अफरोज इर्शाद खान,अल्पसंख्यांक तालुकाध्यक्ष बिलाल सय्यद, ज्ञानेश्वर झोले आदी उपस्थित होते. व्हिडीओ बातमी पहा https://youtube.com/shorts/XUvMeE8mICA?si=XGv_sM9skAivLzHa