इगतपुरीनामा न्यूज – दिवाळी म्हणजे केवळ दिव्यांची रोषणाई आणि फराळाचा गोडवा नव्हे, तर तो नात्यांची वीण घट्ट करणारा आणि मनामनांतील स्नेह उजळवणारा सण आहे. आजच्या विभक्त आणि धावपळीच्या काळात जिथे कुटुंबे लहान होत चालली आहेत, तिथे इगतपुरी तालुक्यातील अस्वली स्टेशन येथील दराडे कुटुंबाने तब्बल ६५ सदस्यांना एकाच छताखाली एकत्र आणत दिवाळीचा एक अविस्मरणीय आणि ऐतिहासिक सोहळा साजरा केला आहे. त्यांच्या या एकतेच्या दिपोत्सवाची चर्चा सध्या संपूर्ण परिसरात कौतुकाने होत आहे. अस्वली स्टेशन येथील स्व. किसनराव आणि स्व. गिताबाई दराडे यांच्या आदर्श संस्कारांच्या छत्रछायेखाली त्यांचा अवाढव्य परिवार आजही एकोप्याने नांदतो आहे. यंदाच्या दिवाळीत त्यांचे पाच सुपुत्र बबनराव, तानाजी, उत्तम, जगन आणि किशोर यांच्यासह त्यांच्या सर्व सुना, नातू, नाती, नातसुना आणि गोड पणतू-पणती असा तब्बल ६५ जणांचा परिवार एकत्र आला होता. घराच्या दारात काढलेली आकर्षक रांगोळी, झगमगणारे फुलांचे तोरण, आंब्याच्या पानांची सजावट आणि घरभर दरवळणारा अस्सल गावरान फराळाचा घमघमाट याने संपूर्ण वातावरणात चैतन्य निर्माण केले होते. आजीच्या मायेच्या सावलीत बागडणारी नातवंडे, आईच्या हातच्या फराळाची चव चाखणारे लेकरं आणि भावंडांच्या जुन्या नव्या गप्पांचा कल्लोळ यामुळे दराडे कुटुंबाचे अंगण जणू आनंदाचे माहेरघरच बनले होते.
या अनोख्या दिवाळीत केवळ सण साजरा झाला नाही, तर पिढ्यान्‌पिढ्यांचे अंतर मिटवणारे जिव्हाळ्याचे क्षण अनुभवायला मिळाले. मोठ्यांनी लहानांना प्रेमाने आशीर्वाद दिले, तर लहानांनी मोठ्यांच्या चरणी नतमस्तक होऊन नात्यांचा मान राखला. संध्याकाळी फटाक्यांच्या आतषबाजीने जसे आकाशाचे दीप उजळले, तसेच एकमेकांच्या भेटीगाठींनी आणि आपुलकीच्या शब्दांनी प्रत्येकाचे मन उजळून निघाले. एकत्र जेवणाचे पंक्तीव्यवहार, खमंग फराळाचा आस्वाद, कौटुंबिक आठवणींचे फोटो आणि खदखदून हसणारी मने या सगळ्यांमुळे ही दिवाळी एक सोहळा ठरली. आजच्या काळात विभक्त कुटुंबांची संख्या वेगाने वाढत असताना, दराडे कुटुंबाने ६५ जणांचा महापरिवार एकाच अंगणात एकत्र आणून अखंडतेचा एक दीपस्तंभ उभा केला आहे. “एकत्र कुटुंब, हेच खरे सुख” हा अमूल्य संदेश या कुटुंबाने संपूर्ण समाजाला दिला आहे. दिव्यांच्या प्रकाशाने उजळलेले अंगण आणि स्नेहाने भारलेली मने, यामुळे दराडे कुटुंबाची ही दिवाळी परिसरामध्ये दीपस्तंभासारखी तेजोमय ठरली असून सर्वत्र कौतुकाचा विषय बनली आहे.
