इगतपुरीनामा न्यूज – यशाचा मार्ग हा नेहमीच मेहनत, चिकाटी आणि आत्मविश्वास यांच्या पायावर उभा असतो. दहावीची परीक्षा ही फक्त गुणांची नव्हे, तर जिद्दीची आणि सातत्याची खरी कसोटी असते. बदलत्या गतिमान काळात प्रत्येक दिवस नवे आव्हान उभे करतो. अशा संघर्षमय काळात परिपूर्ण अखंड यश मिळवणे अजिबात सोपे नाही. मात्र सातत्य, ध्येय पूर्तीसाठी कठोर परिश्रम आणि सुयोग्य मार्गदर्शन या त्रिसूत्रीने यशस्वी होता येते. हा परिपाठ इगतपुरी तालुक्यातील घोटी बुद्रुक येथील आदर्श इंग्लिश मिडीयम स्कुलने घालून दिला. सीबीएससी बोर्डाच्या माध्यमातून या शाळेच्या विद्यार्थ्यांनी दहावीची परीक्षा दिली आणि सर्वजण उत्तम गुणांनी यशवंत झाले. शाळेचा निकाल १०० टक्के लागला. विशेष म्हणजे ह्या शाळेची ही पहिलीच दहावीची बॅच आहे. इगतपुरी तालुक्यात विविध शाळा आणि त्यांची वेगळी शैक्षणिक शैली असतांना सर्वांवर मात करीत या शाळेने यशाचा खरा आनंद विद्यार्थ्यांना मिळवून दिला. घोटी येथील मनिलाल किसनलाल ट्रस्टतर्फे ही शाळा चालण्यात येते आहे.
यावर्षीच्या पहिल्या बॅचमध्ये पहिला क्रमांक सम्यक ईश्वर चोरडिया आणि भूमी कुमट या दोघांनी ९३ टक्के गुण मिळवून पटकावला. दुसरा क्रमांक समृद्धी कुमारपाल चोरडिया हिने संपादन केला. ट्रस्टी मदनशेट किसनलाल पिचा, मेहुल प्रकाश शाह, संजय रायसोनी, पंकज छाजेड आदींनी शिक्षक व विद्यार्थ्यांचे अभिनंदन केले आहे. शिक्षिका सोनाली पिचा, लता गौड, गोपाळ गौड, दीपक आव्हाड, निलेश टाचणकर यांनी घेतलेल्या मेहनतीचे चीज झाल्याची भावना व्यक्त केली. घोटी मर्चंट बँकेचे जनसंपर्क संचालक ईश्वर चोरडिया, पारस चोरडिया, महेश कपिले आदींनी आनंद व्यक्त करून ह्या शाळेला आगामी काळात मोठे यश मिळेल अशी आशा व्यक्त केली. लीलावती पुंजाराम सोनवणे उर्फ नानी ह्या गेल्या ५० वर्षांपासून आदर्श इंग्लिश स्कूलची धुरा समर्थपणे सांभाळत आहेत. त्यांनी घडवलेल्या विद्यार्थ्यांना ट्रस्टी बनवून ह्या शाळेचा विकास करून दाखवला. त्यांचे मोलाचे मार्गदर्शन ह्या शाळेच्या गगनभरारीसाठी उपयोगी ठरले.
