इगतपुरीनामा न्यूज – भावी पिढीला सर्वांगीण सदृढ करण्यासाठी विद्यार्थ्यांचा सर्वांगीण विकास, समर्पण आणि प्रेरणादायी कार्यासाठी राज्य आदर्श शिक्षक प्रमोद परदेशी प्रसिद्ध आहेत. त्यांची निस्वार्थ सेवा आणि बदलत्या तंत्रज्ञानाच्या बौद्धिक ज्ञानाचे कौतुक करून पुरस्कार प्रदान करतो असे प्रतिपादन नाशिक जिल्हा परिषदेचे मुख्य कार्यकारी अधिकारी ओमकार पवार यांनी केले. इगतपुरी तालुक्यातील अतिशय दुर्गम आदिवासी वस्तीतील धामडकीवाडी जिल्हा परिषद शाळेचे राज्य आदर्श पुरस्कार प्राप्त शिक्षक प्रमोद परदेशी यांना ‘दीपस्तंभ : शिक्षक सन्मान पुरस्कार प्रदान करण्यात आला. यावेळी मुख्य कार्यकारी अधिकारी ओमकार पवार बोलत होते. त्यांच्या हस्ते प्रमोद परदेशी यांना लॅपटॉप व प्रशस्तीपत्र प्रदान करून गौरविण्यात आले. यावेळी शिक्षणाधिकारी (प्राथमिक) साईलता सामलेटी, शिक्षणाधिकारी (योजना) सरोज जगताप आदी उपस्थित होते. प्रमोद परदेशी यांना पुरस्कार मिळाल्याने इगतपुरी तालुक्यात आनंद व अभिमानाची भावना व्यक्त होत आहे.
नाशिक जिल्ह्यातील शिक्षकांच्या नाविन्यपूर्ण शैक्षणिक कार्याचा गौरव करण्यासाठी नाशिक जिल्हा परिषदेच्या वतीने आयोजित ‘दीपस्तंभ : शिक्षक सन्मान सोहळा’ संपन्न झाला. मध्यवर्ती सभागृह, नवीन प्रशासकीय इमारत, जि. प. नाशिक येथे उत्साहपूर्ण वातावरणात हा कार्यक्रम पार पडला. जिल्ह्यातील विद्यार्थ्यांची शैक्षणिक गुणवत्ता वाढावी, शिक्षकांच्या अभिनव उपक्रमांना प्रोत्साहन मिळावे. यासह उत्कृष्ट कार्य करणाऱ्या शिक्षकांचा सन्मान व्हावा या उद्देशाने हा कार्यक्रम आयोजित करण्यात आला होता. सोहळ्यात उपक्रमशील शिक्षक, TEACH Tool अंतर्गत यशस्वी निरीक्षक, ‘लीडरशिप फॉर इक्विटी’ (LFE) संस्थेच्या निपुण अभ्यासवर्गातील प्रेरक शिक्षक, विविध शैक्षणिक उपक्रमांमध्ये उल्लेखनीय कामगिरी करणाऱ्या शिक्षकांचा गौरव करण्यात आला. यावेळी Computer Science Teacher Excellence Course उत्तम गुणांसह पूर्ण करणाऱ्या राज्यातील टॉप २० शिक्षकांना लॅपटॉप देऊन सन्मानित करण्यात आले. कार्यक्रमाला जिल्ह्यातील शिक्षक, केंद्रप्रमुख व शिक्षण विभागातील अधिकारी मोठ्या संख्येने उपस्थित होते. हा सोहळा जिल्ह्यातील शिक्षकांसाठी प्रेरणादायी ठरून शैक्षणिक गुणवत्ता वृद्धीस चालना देणारा ठरला.
