इगतपुरीनामा न्यूज – गडवाट – प्रवास सह्याद्रीचा संस्था प्रत्येकवर्षी सामाजिक, शैक्षणिक कार्याद्वारे शिवजयंती साजरी करून शिवरायांना मानवंदना देण्याचे कार्य करत असते. आजवर समाजातील आर्थिकदृष्ट्या दुर्बल घटकांना वस्तु किंवा आर्थिक स्वरुपात शक्य होईल तितकी मदत आजवर गडवाटने केलेली आहे. सर्वच गड वाटकरी सामाजिक बांधिलकीच्या हेतूने एकत्र काम करत असून पारदर्शक कारभार या भक्कम मूलतत्त्वावर संस्था गेल्या १३ वर्षांपासुन कार्यरत आहे. यावर्षीची शिवजयंती तरुण गडवाटकरी कै. दर्शन विनायक झनकर यांच्या स्मृतींना उजाळा देत त्याच्या शाळेतील विद्यार्थ्यांना शिवसंस्कार देणारी असणार आहे. यावर्षी मल्लखांब प्रात्यक्षिक, इतिहास अभ्यासक अजयदादा जाधवराव यांचे प्रभावी व्याख्यान, शालेय वस्तू वाटप, गुणवंत विद्यार्थ्यांचे सत्कार, स्नेहभोजन असे कार्यक्रम घेतले जाणार आहेत. ह्या कार्यक्रमाला प्रमुख अतिथी म्हणून बीज संवर्धन चळवळीतील प्रभावी व्यक्तिमत्त्व बीजमाता ममताताई भांगरे उपस्थित राहणार आहेत. जनता विद्यालय, भरविर बुद्रुक, ता. इगतपुरी, जि. नाशिक येथे १९ फेब्रुवारीला सकाळी ८ वाजता हा सोहळा होणार असल्याचे आयोजकांनी सांगितले.
