लेखन – देविदास हिंदोळे, आदर्श शिक्षक
घोटी कृषि उत्पन्न बाजार समितीचे माजी उपसभापती, कुर्णोली विविध कार्यकारी सहकारी संस्थेचे माजी चेअरमन, वाकी खापरी धरण कृती समितीचे अध्यक्ष, पिंपळगाव भटाटा ग्रामपंचायतीचे बिनविरोध माजी सरपंच तथा जेष्ठ समाजसेवक काशिनाथ रभाजी गातवे यांचे शनिवारी वृद्धापकाळाने दुःखद निधन झाल्याने इगतपुरी तालुक्यात शोककळा पसरली आहे. त्यांनी आपल्या आयुष्यात प्रामाणिकपणे लोकसेवेची विचारधारा निरंतर जोपासली. इगतपुरी तालुक्यात माजी आमदार विठ्ठलराव घारे, शिवराम झोले, पांडुरंग गांगड, काशिनाथ मेंगाळ, लोकनेते गोपाळराव गुळवे, शिवसेना नेते निवृत्ती जाधव, राष्ट्रवादी नेते गोरख बोडके, माजी सभापती लहानू हिंदोळे, माजी सभापती कल्पना हिंदोळे आदी आमदार, जिल्हा परिषद आणि पंचायत समिती सदस्य, निवडून आणण्यासाठी स्व. काशिनाथ गातवे यांचे मोलाचे योगदान आहे. समाजकार्य आणि लोकसेवेत त्यांनी कधीही राजकारण केलं नाही. वाकी खापरी धरण कृति समिती अध्यक्ष असताना पिंपळगाव भटाटा, कोरपगांव, भावली बुद्रुक, वाळविहीर, धार्णोली प्रकल्पग्रस्त नागरिकांना भौतिक सुविधांसोबतच पाणी परवानगी, वाढीव आर्थिक मोबदला मिळवून देण्यासाठीही त्यांनी केलेले कार्य आणि योगदान अविस्मरणीय आहे. वाकी खापरी धरण कामासाठी स्व. काशिनाथबाबा गातवे यांची अखंड साथ आणि सहकार्य असल्यामुळे धरणाचे काम दर्जेदार आणि भक्कम करू शकलो. प्रकल्पग्रस्त नागरिकांच्या समस्या बाबांच्या माध्यमातून शासनापर्यंत पोहोचल्यामुळे ते उत्तम काम करता आले अशी भावना प्रादेशिक जलसंधारण अधिकारी तथा तत्कालीन सहाय्यक अभियंता इंजि. हरिभाऊ गिते यांनी व्यक्त केली. स्व. काशिनाथ रभाजी गातवे निस्वार्थी लोकसेवकाला इगतपुरीनामा परिवारातर्फे भावपुर्ण श्रद्धांजली.
