इगतपुरीनामा न्यूज – इगतपुरी नगरपरिषदेच्या निवडणुकीला दीड महिना उलटूनही नगरसेवकांमधून निवडून दिल्या जाणाऱ्या दोन स्वीकृत नगरसेवकांची निवड अद्याप झालेली नसल्याने शहराच्या राजकीय वर्तुळात जोरदार चर्चा सुरू आहे. इच्छुकांची मोठी संख्या, शिवसेना शिंदे गट व राष्ट्रवादी काँग्रेस अजित पवार गटाच्या अंतर्गत गटबाजी व नाराजीमुळे ही प्रक्रिया थांबली असल्याची चर्चा दबक्या आवाजात सुरू आहे. डिसेंबरच्या निवडणुकीत जनतेने भरभरून मतदान करत शिवसेना शिंदे गटाच्या नगराध्यक्षांना कौल दिला. २१ पैकी १३ नगरसेवक राष्ट्रवादी काँग्रेस अजित पवार गटाचे, तर ५ नगरसेवक शिवसेना शिंदे गटाचे निवडून आले. कायद्यानुसार नगरपरिषदेत दोन स्वीकृत नगरसेवकांची निवड होणे अपेक्षित आहे. उपनगराध्यक्ष निवडीवेळीच स्वीकृत नगरसेवकांची निवड होणार होती. मात्र सत्ताधारी दोन्ही गटांतील अंतर्गत मतभेद आणि राजकीय गणितांमुळे ‘अपूर्ण कागदपत्रे’ हे कारण पुढे करून निवड पुढे ढकलली गेली. मात्र विषय समित्यांच्या निवडीवेळी कोणतीही अडचण न येता निवडणूक पार पडल्याने या कारणावर सवाल उपस्थित होत आहे. विविध विषय समित्यांची निवड प्रक्रिया पूर्ण झाली असली, तरी स्वीकृत नगरसेवकांच्या निवडीबाबत अद्याप कोणताही निर्णय झालेला नाही. स्वीकृत नगरसेवकांच्या माध्यमातून विविध क्षेत्रातील अनुभवी व तज्ज्ञ व्यक्तींना नगरपरिषदेत प्रतिनिधित्व दिले जाते. त्यामुळे ही निवड महत्त्वाची मानली जाते. दरम्यान, “स्वीकृत नगरसेवकांची निवड नेमकी कधी होणार?” असा सवाल आता नागरिकांमधून उपस्थित केला जात आहे. सत्ताधारी गटातील अंतर्गत नाराजी दूर होणार की पुन्हा एकदा राजकीय ओढाताणीमुळे निर्णय लांबणीवर पडणार, याकडे इगतपुरीकरांचे लक्ष लागले आहे.
