इगतपुरीनामा न्यूज – इगतपुरी तालुक्यातील अतिशय दुर्गम व आदिवासी बहुल परिसरात वसलेल्या जिल्हा परिषद प्राथमिक शाळा गांगडवाडी व कारावाडी येथे सामाजिक बांधिलकी आणि मानवी संवेदनांचा प्रेरणादायी प्रत्यय आला. ऊषा अँड परमेश्वर स्नेहलता लखोटिया फाउंडेशन, मुंबई (पूर्वीचे नाव : ऊषा चॅरिटेबल ट्रस्ट) यांच्या वतीने विद्यार्थ्यांसाठी स्नेहिल सहाय्य उपक्रम राबविण्यात आला. हिवाळ्यातील तीव्र थंडीचा विचार करून फाउंडेशनकडून दोन्ही शाळांतील विद्यार्थ्यांना उबदार ब्लँकेट्सचे वाटप करण्यात आले. या उपक्रमामुळे विद्यार्थ्यांना केवळ शारीरिक उबच मिळाली नाही, तर त्यांच्या मनात आपुलकी, सुरक्षितता व आत्मविश्वासाची भावना निर्माण झाली. दुर्गम डोंगराळ भागातील गरजू विद्यार्थ्यांसाठी ही मदत मायेचा आधार ठरली.
हा सामाजिक उपक्रम प्रत्यक्षात आणण्यासाठी राज्य आदर्श शिक्षक प्रमोद परदेशी यांचे मार्गदर्शन व सहकार्य लाभले. त्यांच्या सततच्या प्रयत्नांमुळे ही मदत योग्य वेळी आणि योग्य ठिकाणी पोहोचू शकली. कार्यक्रमाचे नियोजन गांगडवाडी शाळेचे मुख्याध्यापक कैलास चित्ते, कारावाडी शाळेच्या मुख्याध्यापिका जिजा खाडे यांनी अत्यंत सुयोग्य पद्धतीने केले. शिक्षकवृंदाच्या सहकार्यामुळे कार्यक्रम यशस्वीरीत्या पार पडला. कार्यक्रमप्रसंगी दोन्ही गावांतील ग्रामस्थ, सामाजिक कार्यकर्ते व मान्यवर उपस्थित होते. सर्वांनी लखोटिया फाउंडेशनच्या संवेदनशील उपक्रमाचे मनापासून कौतुक केले. भविष्यातही अशा समाजोपयोगी व शैक्षणिक उपक्रमांच्या माध्यमातून दुर्गम आदिवासी भागातील विद्यार्थ्यांचे जीवन अधिक सशक्त व उज्ज्वल व्हावे, अशी अपेक्षा व्यक्त करण्यात आली.
