इगतपुरीनामा न्यूज – भाऊबीजेच्या अत्यंत उत्साही व आनंदी वातावरणात त्र्यंबकेश्वर तालुक्यातून एक अतिशय हृदयद्रावक बातमी समोर आली आहे. तालुक्यातील बेझे येथील धरणाच्या पाण्यात बुडून एकाच कुटुंबातील पिता आणि त्यांच्या दोन निष्पाप चिमुकल्या मुलींचा दुर्दैवी मृत्यू झाला. आज बुधवारी ११ नोव्हेंबरला घडलेल्या या घटनेमुळे इगतपुरी तालुक्यातील वाघेरे गाव आणि संपूर्ण तालुक्यावर शोककळा पसरली आहे. पोलिसांकडून मिळालेल्या प्राथमिक माहितीनुसार, सुरेश नामदेव भोर (वय ४२), ज्योती सुरेश भोर (वय १०) आणि हर्षदा सुरेश भोर (वय ७, सर्व रा. वाघेरे , ता. इगतपुरी, जि. नाशिक) हे तिघे बेझे धरणाच्या परिसरात गेले असताना पाण्यात बुडाले. घटनेची माहिती मिळताच स्थानिक नागरिकांच्या मदतीने तिघांनाही तातडीने पाण्याबाहेर काढून उपचारासाठी त्र्यंबकेश्वर उपजिल्हा रुग्णालयात दाखल करण्यात आले. मात्र वैद्यकीय अधिकारी डॉ. वैभव पाटील यांनी तपासणी करून दुपारी १:२० वाजेच्या सुमारास तिघांनाही मृत घोषित केले. सणासुदीच्या आणि त्यातही भाऊबीजेच्या पवित्र दिवशीच भोर कुटुंबावर कोसळलेल्या या भीषण आपत्तीमुळे वाघेरे (ता. इगतपुरी) तसेच त्र्यंबकेश्वर परिसरात अत्यंत हळहळ व्यक्त केली जात आहे. याप्रकरणी त्र्यंबकेश्वर पोलीस ठाण्यात अकस्मात मृत्यूची नोंद करण्यात आली असून अधिक तपास सुरू आहे.
