इगतपुरीनामा न्यूज – आज शनिवारी ७ नोव्हेंबरला रेल्वे अपघातात ४९ वर्षीय व्यक्तीचा मृत्यू झाल्याची दुर्दैवी घटना घडली. ही घटना इगतपुरी तालुक्यातील घोटी पोलीस ठाण्याच्या हद्धीत माणिकखांब शिवारात घडली. विजयकुमार नामदेव भटाटे असे दुर्दैवी व्यक्तीचे नाव आहे. घटनेबाबत स्थानिक नागरिकांनी घोटी पोलिसांना कळवताच पोलिसांनी उत्तरीय तपासणीसाठी घोटी ग्रामीण रुग्णालयात मृतदेह आणला. मात्र वैद्यकीय अधिकारी अक्षय घोरपडे यांनी त्यांना मृत घोषित केले. विजयकुमार भटाटे हे मूळचे टाके घोटी या गावातील रहिवासी असून ते नाशिक शहरात रिक्षा चालवण्याचा व्यवसाय करीत होते. अतिशय प्रामाणिक आणि कष्टाळू स्वभावामुळे ते नाशिकच्या अंबड परिसरात ओळखले जायचे. त्यांच्या अपघाती मृत्यूची घटना समजताच टाके घोटी आणि अंबड परिसरात हळहळ व्यक्त करण्यात आली. त्यांच्या पश्चात पत्नी, मुलगा, मुलगी असा परिवार आहे. घोटी पोलिसांनी अपघाताची नोंद घेतली आहे.