इगतपुरीनामा न्यूज – इगतपुरी तालुक्यात शेती व्यवसायासह अनेक शेतकरी दुग्धव्यवसाय करतात. मात्र मेहनत करूनही दुधाला जास्त भाव मिळत नसल्याने दुग्ध व्यावसायिक हतबल झाले आहे. म्हणून दुधाला ७५ रुपये लिटर भाव मिळावा यासाठी इगतपुरी दूध संघाने उद्या १७ व १८ जानेवारीपासून २ दिवस संप पुकारला आहे. दूध संघाचे अध्यक्ष डॉ. सजन दुभाषे, उपाध्यक्ष विजय जाधव, सागर गणेशकर, चांगदेव गुंजाळ, पिराजी चौरे, तानाजी भोई, सखाराम भटाटे, लक्ष्मण करवर, भगिरथ लंगडे, अजय म्हसणे, ज्ञानेश्वर शिंदे, रोशन सोपनर, सुनील कोकणे, अनिल वाकचौरे, सुनील कोकणे, राजू पवार यांनी ही माहिती दिली. या दोन दिवसात तालुक्यात दूध विक्री होणार नसल्याचे त्यांनी सांगितले. तालुक्यात दुधाळ जनावरांची संख्या पण कमी होतांना दिसत आहे. दुग्धव्यवसायाकडे अनेक बेेेरोजगार युवक वळले आहेत. दुधाळ जनावरे पाळणे सोपे नसताना खूप मोठा त्रास सहन करून पशुपालक त्यांचा नित्यनियमाने सांभाळ करतात. मात्र चारा व ढेपीचे भाव गगनाला भिडल्याने दुग्धव्यवसाय संकटात आहे. विविध समस्यांनी दूध धंद्याला घरघर लागली असून तो मोडकळीस आला आहे. या व्यवसायाला प्रोत्साहन व चालना देण्यासाठी भावात वाढ अत्यावश्यक आहे.
