इगतपुरीनामा न्यूज – भारताचा युवा पॉवरलिफ्टर हर्ष व्यास (दाधीच) याने नुकत्याच व्हियेतनाम येथे पार पडलेल्या आशियन पॉवरलिफ्टिंग अजिंक्यपद २०२५ ह्या स्पर्धेत भारतासाठी २ सुवर्णपदकांची घवघवीत कमाई केली. या स्पर्धेत त्याने ओव्हरऑल SBD आणि डेडलिफ्ट या दोन प्रकारांमध्ये सुवर्णपदक पटकावले. या उल्लेखनीय कामगिरीमुळे त्यांची आता जागतिक अजिंक्यपद स्पर्धेसाठी निवड झाली आहे. इगतपुरी तालुक्यासह नाशिक जिल्ह्यातील नागरिक, युवक आणि प्रशासकीय अधिकाऱ्यांनी हर्ष व्यास याच्या यशाबद्धल आनंद व्यक्त केला असून, त्याच्या पुढील जागतिक स्पर्धेसाठी शुभेच्छा दिल्या आहेत. सिडनेम महाविद्यालय ऑफ कॉमर्स अॅन्ड इकॉनॉमिक्स, मुंबई या नामवंत महाविद्यालयाचा हर्ष व्यास विद्यार्थी आहे. हर्ष याने आपल्या विजयाचे श्रेय प्रशिक्षक प्रा. चैतन्य भोसले, आणि महाविद्यालयाच्या विशेष सहकार्याला दिले आहे. हर्ष व्यास म्हणाला की, “मी तिरंगा पांघरलेला आहे, हीच माझ्यासाठी सर्वात मोठी भावना आहे. माझ्या यशामागे माझे आई वडील, सर्व कुटुंब व माझ्या महाविद्यालयाचा, प्रशिक्षकांचा आणि इगतपुरी तालुक्यातील प्रत्येक नागरिकाचा मोलाचा वाटा आहे.”
