इगतपुरीनामा न्यूज – वाडीवऱ्हे पोलीस स्टेशनचे पोलीस पथक यांनी अवैध दारू मोहिमे अंतर्गत धडक कारवाई सुरु केली आहे. नाशिक ग्रामीण पोलीस अधीक्षक विक्रम देशमाने, अप्पर पोलीस अधीक्षक आदित्य मिरखेलकर यांच्या मार्गदर्शनाखाली उपविभागीय पोलीस अधिकारी हरीश खेडकर ह्यांच्या सूचनेप्रमाणे कारवाई करण्यात येत आहे. आज शनिवारी विधानसभा निवडणुकीच्या अनुषंगाने मुळेगाव वालदेवी नदी भागात सकाळी १० वाजेपासून पोलिसांनी ८ ते १० किलोमीटर जंगलात पायी चालत जाऊन गावठी हातभट्ट्या तोडून २ गुन्हे दाखल केले. गावठी दारू बनविण्यासाठी वापरण्यात येणारे ४ लाख ५२ हजार इतक्या किमतीचे रसायन, गावठी दारू पोलिसांनी यावेळी नष्ट केली. येथील जंगलात असलेल्या दुर्गम भागातील गावठी दारू बनवणाऱ्या हातभट्टीवर वाडीवऱ्हे पोलिसांनी शोध घेत छापा टाकला. वाडीवऱ्हे पोलीस ठाण्यात आज अवैध दारू बाबत २ गुन्हे दाखल करण्यात आले. यापुढेही ही मोहीम अशीच सुरू राहणार असून कुठे दारू तयार अथवा विकली जात असेल तर तात्काळ वाडीवऱ्हे पोलिसांशी संपर्क साधावा. या मोहिमेत पोलीस निरीक्षक हेमंतकुमार भामरे, पोलीस नाईक प्रविण काकड, अदीप पवार, हेमंत तुपलोंढे, पोशि-धोंगडे, पोलीस पाटील जाधव आदी सहभागी होते.