इगतपुरीनामा न्यूज – इगतपुरी तालुक्यातील गोंदे औद्योगिक वसाहतीमध्ये कामगारांच्या प्रश्नांमुळे पुन्हा एकदा अशांततेचे वारे वाहते आहे. रोथे एर्डे कंपनीतील सुमारे १६० कामगारांनी आपल्या विविध मागण्यांसाठी सिटूच्या नेतृत्वाखाली बेमुदत संप पुकारत कंपनीच्या गेटबाहेर ठिय्या आंदोलन सुरू केले आहे. आंदोलनाला जवळपास महिना होत चालला आहे. इगतपुरी तालुक्यात यामुळे कंपनी विरोधात संतापाचे वातावरण वाढत चालले आहे. ह्या कंपनीत गेल्या १० ते १५ वर्षांपासून कार्यरत असलेल्या कामगारांनी कायम नोकरी, वेतनवाढ आणि कामगार कायद्यांनुसार हक्क मिळावेत या प्रमुख मागण्यांसाठी सिटू कामगार संघटनेची स्थापना केली आहे. सिटूच्या नेतृत्वाखाली कामबंद आंदोलनकर्त्यांना सिटूचे राष्ट्रीय उपाध्यक्ष कॉ. डॉ. डी. एल. कराड यांनी संघटित राहून हक्कांसाठी लढावे असा संदेश दिला. सिटूचे जिल्हा सरचिटणीस कॉ. देविदास आडोळे यांनी कामगारांचे होणारे शोषण व पिळवणुकीविरोधात एकजुटीने संघर्ष केल्यासच न्याय मिळू शकतो, असे सांगितले. जनरल सेक्रेटरी कॉ. तुकाराम सोनजे यांनी सांगितले की, गेल्या अनेक वर्षांपासून कामगारांनी कमी वेतनात काम करून कंपनीला सहकार्य केले. मात्र, कामगार कायद्यांनुसार लाभ देण्याऐवजी कंपनी व्यवस्थापनाने संघटना स्थापन करणाऱ्या व युनियनसाठी पुढाकार घेणाऱ्या सुमारे ३० कामगारांना कोणतेही कारण न देता कामावरून कमी करण्याचे षडयंत्र सुरू केले आहे. कामगारांच्या पसंतीच्या युनियनशी व्यवस्थापनाने चर्चा करून प्रश्न सोडविल्याशिवाय आंदोलन मागे घेतले जाणार नसल्याचा इशारा कामगारांनी दिला आहे. सर्वाधिक भूसंपादन इगतपुरी तालुक्यात विविध प्रकल्पांसाठी झाले असून आजही ही प्रक्रिया सुरूच आहे. असे असतानाही स्थानिक युवकांत बेरोजगारीचे प्रमाण वाढत आहे. अनेक कंपन्यांमध्ये कामगारांना ठेकेदारी पद्धतीने अत्यल्प वेतनावर काम करावे लागते. लोकप्रतिनिधींनी बेरोजगार व कामगारांच्या प्रश्नांवर आवाज उठवून न्याय द्यावा अशी मागणी होत आहे.
