इगतपुरीनामा न्यूज – आंबेवाडी येथे ५ दिवसीय अंबिका माता बोहाडा उत्सव होणार आहे. रविवारी २४ मे रोजी लहाना बोहाडा, सोमवारी २५ मे रोजी मोठा बोहाडा होणार आहे. मंगळवारी २६ मे रोजी अंबिका मातेची भव्य मिरवणुक आणि दुपारी जंगी कुस्त्या होणार आहे. गेल्या अनेक वर्षांची परंपरा व संस्कृतीचे प्रतीक मानला जाणारा हा उत्सव ‘बोहाडा’ म्हणून ओळखला जातो. अंगाला झोंबणारा गार वारा, गडद अंधारातही चैतन्यदायी प्रकाश देणारे टेंभे, संबळ, पिपाणी आणि डफ अशा पारंपरिक कर्णमधुर वाद्यांच्या तालावर लयबद्ध पदन्यास करीत नृत्य करणारी विविध देवदेवतांची सोंगे आणि शेवटी मोठ्या भक्तिमय वातावरणात निघालेल्या देवीच्या सोंगाची घरोघर पूजा करणारे ग्रामस्थ अशा आगळ्यावेगळ्या वातावरणात गेली अनेक वर्ष आंबेवाडी गावाने वर्षानुवर्ष जपलेली ही परंपरा आहे.
पर्जन्याच्या आर्जवासाठी ग्रामीण भागात पूर्वीपासून हा उत्सव मोठ्या उत्साहात साजरा केला जातो. मुखवट्यांचे नृत्य किंवा मुखवटेधारी सोंग म्हणजे ‘बोहाडा’ हा आदिवासी महादेव कोळी समाज आणि संस्कृतीचा अविभाज्य भाग आहे. निसर्गाशी संबंधित अनेक देव देवतांचे मुखवटे व वेश परिधान करून पारंपरिक वाद्य असलेले संबळ व पीपाण्यांच्या तालावर मिरवणूक काढली जाते. टेंभे पेटवून त्या उजेडात सकाळपर्यंत ही सोंगे नाचवली जातात. कागदाचा लगदा व जंगली झाड पाला वापरून देव दानवांचे मुखवटे तयार केलेले असतात. शेवटच्या दिवशी सोंगांची मिरवणूक काढली जाते. त्यानंतर जगदंबा व महिषासुराच्या युद्धात वध करून विजयी जगदंबा देवीच्या मिरवणुकीने यात्रेची सांगता होते. बोहाडा महोत्सव शांततेत व सुरळीत पार पाडण्यासाठी पंच कमिटी, ग्रामपंचायत आदी प्रयत्नशील आहे.
