निफाड – निफाड तालुक्याच्या पूर्व भागातील गोंदेगाव, गोळेगाव आणि मरळगोई परिसरात मागील आठ दिवसांपासून रात्रीच्या वेळी आकाशात ड्रोनसदृश उपकरणे उडताना दिसत असल्याने नागरिकांमध्ये भीतीचे वातावरण निर्माण झाले आहे. रात्रीच्या वेळी अचानक आकाशात दिसणाऱ्या या ड्रोनमुळे नेमके काय सुरू आहे, असा प्रश्न नागरिकांना पडला आहे. परिसरात चोरीच्या घटना वाढत असल्याच्या पार्श्वभूमीवर या ड्रोनच्या माध्यमातून चोरटे परिसराची पाहणी तर करत नाहीत ना? अशी भीती नागरिकांमध्ये निर्माण झाली आहे. त्यामुळे अनेक नागरिक रात्रीच्या वेळी अधिक सतर्क झाले असून, काहींची तर रात्रीची झोपच उडाली आहे.
मात्र, गेल्या काही दिवसांपासून ड्रोन दिसत असल्याच्या चर्चा सुरू असतानाही प्रशासनाकडून याबाबत कोणतीही स्पष्ट माहिती किंवा खुलासा करण्यात आलेला नसल्याने नागरिकांमध्ये नाराजी वाढत आहे. हे ड्रोन नेमके कोणाचे आहेत? ते कोण उडवत आहे? कोणत्या कारणासाठी उडवले जात आहेत? त्यासाठी संबंधितांकडे आवश्यक परवानगी आहे का? याची माहिती प्रशासनाने नागरिकांसमोर स्पष्ट करावी, अशी मागणी होत आहे. निफाड पूर्व भागात अलीकडे रात्रीचे अघोषित भारनियमन सुरू असल्याने रात्री वीज नसते. त्यात मका पिके मोठी झाल्याने बिबट्याची दहशत वाढली आहे. हे कमी की काय, पशुचोर देखील सक्रिय झाले आहेत. त्यामुळे नागरिक आधीच चिंतेत असतांना उडणाऱ्या ड्रोनने आणखी चिंता वाढवली आहे.
" गोंदेगाव परिसरात रात्री उडणारे ड्रोन संशयास्पद आहे. नागरिकांच्या हालचालींवर देखरेख ठेवली जात आहे का ?असा प्रश्न उभा राहिला आहे. हे प्रकरण नक्की काय आहे याबाबत प्रशासनाने खुलासा करण्याची गरज आहे. अनधिकृत ड्रोन उडवणाऱ्या व्यक्तींवर गुन्हे दाखल करण्यात यावेत.
- निलेश चिखले (गोंदेगाव)