इगतपुरीनामा न्यूज – दिव्यांग क्षेत्रात उत्कृष्ट व उल्लेखनीय कार्य केल्याबद्दल रोटरी क्लब नाशिक ग्रेप सिटीतर्फे आदिवासी बहुल इगतपुरी तालुक्यातील जिल्हा परिषद प्राथमिक शाळा घोटी मुले १ चे बाळू पांडुरंग गतीर, जिल्हा परिषद प्राथमिक शाळा अप्पर पेठचे उत्तम भाऊसाहेब आंधळे, जिल्हा परिषद प्राथमिक शाळा, घोटी मुली-१ च्या स्मिता आकाश खोब्रागडे, जिल्हा परिषद प्राथमिक शाळा, लोअर पेठचे संदीप केदा शिरसाठ ह्या ४ विशेष शिक्षकांना ‘नेशन बिल्डर अवॉर्ड’’ देऊन सन्मानित करण्यात आले. हे सर्व शिक्षक गेल्या १८ वर्षांपासून आदिवासी भागात दिव्यांग विद्यार्थ्यांना शिक्षणाच्या मुख्य प्रवाहात आणण्यासाठी अविरत कार्य करत आहेत. त्यांनी विद्यार्थी सर्वेक्षण करणे, विद्यार्थ्यांच्या गरजेनुसार विविध शिबिरांचे आयोजन करणे, लाभार्थी विद्यार्थ्यांना शस्त्रक्रिया व आवश्यक साहित्य-साधने उपलब्ध करून देणे, दिव्यांग विद्यार्थ्यांना प्रमाणपत्र व युडीआयडी कार्ड मिळवून देण्याचे महत्त्वपूर्ण कार्य केले आहे. तालुक्यातील ३२५ शाळांमधील पालक, शिक्षक व मुख्याध्यापकांना दिव्यांग विद्यार्थ्यांबाबत जनजागृतीसाठी विशेष प्रशिक्षणही दिले आहे. रोटरी क्लब नाशिक ग्रेप सिटीच्या अध्यक्षा जयश्री पाटील, डायरेक्टर मेधा पुणतांबेकर, सचिव कौस्तुभ महाजन, आशा वेणुगोपाल आदींच्या हस्ते पुरस्कार प्रदान करण्यात आला. या उल्लेखनीय यशाबद्दल इगतपुरीचे गटशिक्षणाधिकारी बाळासाहेब मुंडे, शिक्षण विस्ताराधिकारी मंजुषा साळुंखे, किशोर सोनवणे, प्रमोद चिंचोले आणि सर्व केंद्रप्रमुखांनी अभिनंदन करून पुढील वाटचालीस शुभेच्छा दिल्या आहेत.
