इगतपुरीनामा न्यूज – वाडीवऱ्हे पोलीस ठाणे हद्धीत वालदेवी धरण परिसरात एक दुर्दैवी घटना घडली आहे. एक युवक पाण्यात बुडाल्याची भीती व्यक्त करण्यात येत आहे. उमेश कटकाळे रा. सातपूर दत्त मंदिर असे युवकाचे नाव आहे. ही घटना रायगडनगर जवळील जाधववाडी परिसरात सायंकाळी साडेसातच्या सुमारास घडली. प्राथमिक माहितीनुसार नाशिक येथून काही मित्र वालदेवी धरण परिसरात फिरण्यासाठी आले होते. यावेळी परिसरातील पाण्याचा आनंद घेण्यासाठी त्यातील उमेश कटकाळे हा युवक धरणाच्या पाण्यात उतरला. मात्र पाण्याच्या खोलीचा अंदाज न आल्याने तो अचानक बुडू लागला. मित्रांनी त्याला वाचविण्याचा प्रयत्न केला, मात्र अंधार आणि पाण्याची खोली यामुळे त्यांना यश आले नाही. घटनेची माहिती मिळताच वाडीवऱ्हे पोलीस आणि स्थानिक नागरिकांनी घटनास्थळी धाव घेतली. नाशिक येथून पाणबुड्यांना पाचारण करण्यात आले असून त्यांच्या सहाय्याने युवकाचा शोध सुरू आहे. या घटनेमुळे परिसरात हळहळ व्यक्त केली जात असून, धरण परिसरात फिरण्यासाठी येणाऱ्या पर्यटकांनी काळजी घेण्याचे आवाहन स्थानिक प्रशासनाकडून करण्यात येत आहे. व्हिडीओ बातमी पहा https://youtube.com/shorts/Y8wBUFyrKBo?si=-ClZXI6vBfqm3znd
