इगतपुरीनामा न्यूज – रोटरी क्लब ऑफ नाईन हिल्सचे अध्यक्ष गोरख बोडके यांच्या ४७ व्या वाढदिवसाचे औचित्य साधून इगतपुरी तालुक्यातील ४७ शाळांना मोफत संगणक (Computer) वाटप करण्यात येणार आहे. तालुक्याच्या शैक्षणिक विकासाला गती देणे आणि ग्रामीण भागातील विद्यार्थ्यांना डिजिटल शिक्षणाची कवाडे खुली करून देणे, हा या उपक्रमाचा मुख्य उद्देश आहे. उपमुख्यमंत्री स्व. अजितदादा पवार यांच्या दुर्दैवी निधनामुळे यंदा गोरख बोडके यांचा वाढदिवस अत्यंत साधेपणाने पार पडणार असून कोणताही जाहीर सोहळा किंवा उत्सव साजरा केला जाणार नाही. वाढदिवसाचा खर्च टाळून तो निधी थेट विद्यार्थ्यांच्या संगणक शिक्षणासाठी वापरण्याचा कौतुकास्पद निर्णय त्यांनी घेतला आहे. इगतपुरी तालुक्यातील ज्या गरजू, जिल्हा परिषद किंवा अनुदानित शाळांना आपल्या विद्यार्थ्यांना संगणक शिक्षण देण्याची इच्छा आहे, परंतु पुरेशा साधनांअभावी ते शक्य होत नाही, अशा शाळांना प्राधान्य दिले जाईल. इच्छुक शाळांनी संगणकाच्या मागणीसाठी रोटरी क्लबकडे रीतसर अर्ज आणि मागणी पत्र सादर करावे. शाळांनी लवकरात लवकर अर्ज करून या सुवर्णसंधीचा लाभ घ्यावा आणि अधिक माहितीसाठी थेट संपर्क साधावा असे आवाहन रोटरी क्लब ऑफ नाईन हिल्सचे अध्यक्ष गोरख बोडके यांनी केले आहे.
