इगतपुरीनामा न्यूज – भारत गॅसच्या सुवर्ण महोत्सवानिमित्त इगतपुरी येथील ‘साई आनंद भारत गॅस’च्या वतीने ग्राहकांसाठी एका विशेष लकी ड्रॉचे आयोजन करण्यात आले होते. दि. १ ऑक्टोबर २०२५ ते १५ जानेवारी २०२६ या कालावधीत राबवलेल्या या योजनेचा निकाल नुकताच जाहीर झाला आहे. यामध्ये टिटोली येथील नटराज काशिनाथ भडांगे हे १० ग्रॅम सोन्याचे (गोल्ड) लकी ड्रॉमध्ये तिसऱ्या क्रमांकाचे मानकरी ठरले आहेत. ग्राहकांच्या विश्वासाला आणि सहभागाला प्रोत्साहन देण्यासाठी भारत गॅसने या लकी ड्रॉचे आयोजन केले होते. नटराज भडांगे यांचे नाव लकी ड्रॉमध्ये विजेते म्हणून घोषित झाल्यानंतर साई आनंद भारत गॅस इगतपुरीचे संचालक आनंद चांडक यांनी त्यांचे पुष्पगुच्छ देऊन विशेष कौतुक केले आणि उज्ज्वल भविष्यासाठी त्यांचे मनःपूर्वक अभिनंदन केले. भारत गॅसच्या या सुवर्ण महोत्सव योजनेंतर्गत परिसरातील अनेक ग्राहकांनी उत्स्फूर्त सहभाग नोंदवला होता. नटराज भडांगे यांना १० ग्रॅम सोन्याचे बक्षीस मिळाल्यामुळे त्यांच्या कुटुंबियांसह मित्रपरिवारात आनंदाचे वातावरण असून, सर्वच स्तरातून त्यांच्यावर अभिनंदनाचा वर्षाव होत आहे. भारत पेट्रोलियम कॉर्पोरेशन लिमिटेडचे टेरिटरी मॅनेजर महेश एम. यांच्या हस्ते सिन्नर प्लांट येथे सन्मानपूर्वक बक्षीस वितरण करण्यात आले. यावेळी विक्री अधिकारी हर्षनी मॅडम आणि जिल्ह्यातील सर्व वितरक उपस्थित होते.