इगतपुरीनामा न्यूज – वाडीवऱ्हे पोलीस ठाण्याच्या हद्दीत सांजेगाव येथे मंगळवारी हॉटेल हिरवी मिरचीच्या गेटवर वाहनाने जोरात ठोस देऊन महिला मृत्यूमुखी पडल्याची घटना घडली होती. ह्या गाजलेल्या प्रकरणाचा (गु.र.नं. २३७/२०२६) उलगडा करण्यात पोलिसांना मोठे यश मिळाले आहे. नाशिक ग्रामीण स्थानिक गुन्हा शाखा आणि वाडीवऱ्हे पोलिसांनी संयुक्तपणे गुन्ह्याचा उलगडा केला आहे. हा अपघात नसून हत्या असल्याचा संशय व्यक्त करून पोलिसांनी कसून तपास केला. त्यानुसार मृत्यूमुखी पडलेली महिला रुपाली निलेश पाटील (वय ३५, रा. फडोळ मळा, कामटवाडे नाशिक) ही आरोपीची प्रेयसी असून हत्येप्रकरणी ताब्यात घेण्यात आलेला संशयित आरोपी तथा कारचालक दिपक शिवाजी सैंदाणे रा. फडोळ मळा, कामटवाडे नाशिक याने पोलीस चौकशीदरम्यान तिच्या हत्येची कबुली दिली आहे. या प्रकरणात भारतीय न्याय संहिता (BNS) कलम १०३(1) अन्वये हत्या केल्याची कलम वाढ करण्यात आली असून आरोपीला अटक करण्यात आली आहे. पोलिसांनी दिलेल्या माहितीनुसार, संशयित दीपक सैंदाणे याला विश्वासात घेऊन कसून चौकशी केली असता त्याने गुन्ह्याची कबुली दिली. तो त्याची प्रेयसी रुपाली पाटील हिला फिरण्याच्या बहाण्याने सांजेगाव शिवारातील ‘हॉटेल हिरवी मिरची’ येथे घेऊन जात होता. वाटेत दोघांमध्ये काहीतरी कारणावरून वाद झाले. याच वादातून संशयिताने रिसॉर्टच्या गेटसमोर रुपाली पाटील हिला गाडीची धडक देऊन गंभीर जखमी करून तिचा खून केल्याची कबुली दिली. या प्रकरणी पोलिसांनी कायदेशीर प्रक्रिया करत ‘ई-साक्ष’ नोंदवून घेतली आहे. तसेच, घटनास्थळावरील साक्षीदारांचे जबाब नोंदवण्यात आले आहेत. या जबाबानंतर संशयित दीपक सैंदाणे यानेच हा खून केल्याचे निष्पन्न झाले आहे. गुन्ह्याचे गांभीर्य लक्षात घेता यात BNS कलम १०३(1) नुसार कलमवाढ करण्यात आली आहे. पोलिसांनी आरोपीला बेड्या ठोकल्या असून पुढील कायदेशीर कारवाई वेगाने सुरू आहे. उद्या गुरुवारी आरोपीला न्यायालयात रिमांडसाठी हजर करण्यात येणार आहे. नाशिक ग्रामीण पोलीस अधीक्षक डी. एस. स्वामी, अपर पोलीस अधीक्षक श्रीमती विमला, उपविभागीय पोलीस अधिकारी संजय बांबळे यांच्या मार्गदर्शनाखाली स्थानिक गुन्हा शाखेचे पोलीस निरीक्षक राहुल मोरे, वाडीवऱ्हेचे पोलीस निरीक्षक धीरज महाजन, सहाय्यक पोलीस निरीक्षक हेमंत फड, पोलीस उपनिरीक्षक रामनाथ दिवे, पोलीस कर्मचारी विक्रम काकड, विशाल सोनवणे यांच्यासह स्थानिक गुन्हा शाखा व वाडीवऱ्हे पोलीस यांनी ह्या घटनेचा उलगडा केला. पुढील तपास कसून सुरु झाला आहे.
