इगतपुरीनामा न्यूज – स्वातंत्र्य दिनाच्या कार्यक्रमात समाजातील एकल महिलांना सन्मानाचे स्थान मिळावे, त्यांचा आत्मविश्वास वाढावा आणि त्यांना समाजाच्या मुख्य प्रवाहात सन्मानाने सहभागी करून घेता यावे, या उद्देशाने नाशिक जिल्हा परिषदेचे मुख्य कार्यकारी अधिकारी ओमकार पवार यांनी अभिनव संकल्पना मांडली आहे. त्यांच्या या संकल्पनेनुसार इगतपुरीचे गटविकास अधिकारी महेश वळवी, प्रशासक तथा विस्ताराधिकारी ज्ञानेश्वर कऱ्हाळे यांच्या मार्गदर्शनाखाली इगतपुरी तालुक्यातील भावली खुर्द ग्रामपंचायतीमध्ये स्वातंत्र्य दिनाचे ध्वजारोहण ग्रामपंचायत शिपाई प्रमिला कैलास उबाळे ह्या एकल महिलेच्या हस्ते करण्यात आले. स्वातंत्र्य दिनाच्या निमित्ताने देशभरात विविध ठिकाणी ध्वजारोहणाचे कार्यक्रम आयोजित केले जातात. मात्र, यावेळी एकल महिलांच्या हस्ते ध्वजारोहण करून त्यांना समाजात सन्मानाचे स्थान देण्याचा उपक्रम भावली खुर्द ग्रामपंचायतीने राबविला. या उपक्रमातून एकल महिलांच्या सन्मानाबरोबरच त्यांच्यामध्ये आत्मविश्वास निर्माण करण्याचा सकारात्मक संदेश देण्यात आल्याचे ग्रामपंचायत अधिकारी रुपाली जाधव यांनी सांगितले. यावेळी ध्वजपूजन एकल महिला सायजाबाई उबाळे, संजीवनी उबाळे, किशोरी तेलम, लताबाई वीर यांनी केले. नाशिक जिल्हा परिषदेचे मुख्य कार्यकारी अधिकारी ओमकार पवार यांच्या संकल्पनेला ग्रामपंचायतीने सकारात्मक प्रतिसाद देत स्वातंत्र्य दिनाच्या कार्यक्रमात त्याची अंमलबजावणी केली. एकल महिलेच्या हस्ते राष्ट्रध्वज फडकविण्यात आल्यानंतर उपस्थितांनी राष्ट्रध्वजाला मानवंदना दिली. यावेळी राष्ट्रगीत, देशभक्तीपर घोषणांनी परिसर दुमदुमून गेला. या उपक्रमामुळे एकल महिलांना केवळ सहानुभूतीची नव्हे, तर सन्मान आणि समानतेची वागणूक मिळणे आवश्यक आहे, हा संदेश समाजापर्यंत पोहोचला. प्रशासनाच्या सकारात्मक संकल्पनेला ग्रामपातळीवर मिळालेला हा प्रतिसाद सामाजिक परिवर्तनाच्या दृष्टीने महत्त्वपूर्ण मानला जात आहे. भावली खुर्द ग्रामपंचायतीने राबविलेल्या या उपक्रमाचे ग्रामस्थांकडून स्वागत करण्यात आले. भविष्यातही महिलांच्या सक्षमीकरणासाठी आणि सामाजिक समतेसाठी अशा उपक्रमांचे आयोजन करण्यात यावे, अशी अपेक्षा यावेळी व्यक्त करण्यात आली. जगन्नाथ आगिवले, योगेश आगिवले, चंद्रकांत आगिवले, भास्कर तेलम, सुरेश तेलम, मुख्याध्यापक सूर्यवंशी, शिक्षक आणि ग्रामस्थ उपस्थित होते.
