इगतपुरीनामा न्यूज – लाचलुचपत प्रतिबंधक विभागाच्या नाशिक परिक्षेत्रात उत्कृष्ट, निष्कलंक आणि कर्तव्यतत्पर सेवा बजावल्याबद्दल नाशिक एसीबीचे पोलीस हवालदार संदीप विश्वनाथ हांडगे यांना मानाचे ‘उत्कृष्ट सेवा पदक’ जाहीर झाले आहे. उद्या स्वातंत्र्यदिनी त्यांना पदक वितरित केले जाणार आहे. त्यांच्या उल्लेखनीय यशाबद्दल पोलीस वर्तुळातून आणि नागरिकांमधून त्यांच्यावर अभिनंदनाचा वर्षाव होत आहे. संदीप हांडगे यांनी आपल्या पोलीस सेवेदरम्यान लाचलुचपत प्रतिबंधक विभागात अत्यंत प्रामाणिकपणे आणि पारदर्शकतेने कर्तव्य बजावले आहे. भ्रष्टाचाराविरुद्धच्या कारवाईत त्यांनी दाखवलेले धाडस, कर्तव्यनिष्ठा आणि तपासातील उत्कृष्ट कामगिरी लक्षात घेऊन शासनाकडून त्यांना या प्रतिष्ठेच्या पदकासाठी निवडण्यात आले आहे. त्यांच्या या यशाने नाशिक लाचलुचपत प्रतिबंधक विभागाच्या शिरपेचात मानाचा तुरा रोवला गेला आहे. संदीप हांडगे यांना उत्कृष्ट सेवा पदक जाहीर झाल्याबद्दल पोलीस अधीक्षक, लाचलुचपत प्रतिबंधक विभागाचे वरिष्ठ अधिकारी, सहकारी तसेच विविध सामाजिक व राजकीय क्षेत्रातील मान्यवरांनी त्यांचे फोनवरून व प्रत्यक्ष भेटून अभिनंदन केले आहे. या पुरस्कारामुळे विभागातील इतर कर्मचाऱ्यांनाही प्रामाणिकपणे काम करण्याची प्रेरणा मिळेल.
