इगतपुरीनामा न्यूज – ८० व्या स्वातंत्र्यदिनाचे औचित्य साधून आदर्श महिला व बालिका स्नेही पिंपळगाव डुकरा ग्रामपंचायतीच्या वतीने स्वातंत्र्यदिन अत्यंत उत्साहात आणि आगळ्यावेगळ्या उपक्रमात साजरा करण्यात आला. या कार्यक्रमाचे मुख्य आकर्षण म्हणजे गावातील एकल महिलांचा सन्मान करत त्यांच्या हस्ते ध्वजपूजन व झेंडावंदन सोहळा पार पडला. एकल महिला विठाबाई कचरू पवार यांच्या हस्ते राष्ट्रध्वजाचे पूजन करण्यात आले. एकल महिला शोभा नामदेव झनकर यांच्या हस्ते दिमाखात ध्वजारोहन संपन्न झाले. ग्रामपंचायत अधिकारी हर्षिता पिळोदेकर यांनी संपूर्ण कार्यक्रमाचे यशस्वी आयोजन केले. हा प्रेरणादायी उपक्रम नाशिक जिल्हा परिषदेचे मुख्य कार्यकारी अधिकारी ओमकार पवार यांच्या विशेष संकल्पनेतून आणि इगतपुरीचे गटविकास अधिकारी महेश वळवी, प्रशासक साहेबराव देशमुख यांच्या मार्गदर्शनाखाली राबविण्यात आला. आशा सेविका विजया जाधव, अंगणवाडी सेविका सुनीता शिंदे, कल्पना भगत यांनी विशेष परिश्रम घेतले. एकल महिलांना समाजात सन्मानाचे स्थान मिळवून देण्याच्या उद्देशाने ग्रामपंचायतीने घेतलेला हा निर्णय कौतुकास्पद ठरला आहे.या सोहळ्याला पिंपळगाव डुकरा गावातील प्रतिष्ठित पदाधिकारी, शिक्षक वृंद, सर्व शासकीय कर्मचारी मोठ्या संख्येने उपस्थित होते. कर्मचारी आणि ग्रामस्थांनी मोठ्या उत्साहात सहभाग नोंदवून स्वातंत्र्यदिनाचा आनंद साजरा केला.