इगतपुरीनामा न्यूज – इगतपुरी शहरात दिवसाढवळ्या ४ लाख ५० हजार रुपयांची लूट झाल्याची धक्कादायक घटना समोर आली आहे. ही घटना सोमवारी दुपारी घडली. याप्रकरणी इगतपुरी पोलीस ठाण्यात गुन्हा दाखल करण्यात आला असून अज्ञात आरोपींचा कसून शोध सुरू आहे. फिर्यादी अण्णा त्र्यंबक सुरसे, वय ५६, रा. शिवाजी नगर, जेलरोड, नाशिक यांनी सोमवारी दुपारी पावणेदोन वाजण्याच्या सुमारास इगतपुरी येथील भारतीय स्टेट बँकेच्या शाखेतून ४ लाख ५० हजार रुपये काढले होते. ही रक्कम पांढऱ्या पिशवीत ठेवून ते पायी जात असताना बँकेपासून सुमारे ५० मीटर अंतरावर दुचाकीवरून आलेल्या दोन अज्ञात इसमांनी त्यांना अडवले. अज्ञात आरोपींनी फिर्यादीला धक्का देत त्यांच्या हातातील पैशांची पिशवी हिसकावून घेतली व घटनास्थळावरून पसार झाले. या रकमेत ५०० रुपयांच्या नोटांचे ९ बंडल होते. याबाबत अधिक तपास पोलीस निरीक्षक सारिका अहिरराव यांच्या मार्गदर्शनाखाली जी. डी. परदेशी, विजय रुद्रे, निलेश देवराज करत असून आरोपींचा शोध सुरू आहे.
दरम्यान, शहरात दिवसाढवळ्या झालेल्या या लुटीमुळे नागरिकांमध्ये भीतीचे वातावरण निर्माण झाले आहे.
