
इगतपुरीनामा न्यूज : इगतपुरी तालुक्यातील खडकवाडी येथील जिल्हा परिषद शाळेतील १ ते ५ वी साठी असणाऱ्या २ शिक्षिकांच्या मनमानी कारभाराचा आणि बेजबाबदारपणाचा धक्कादायक प्रकार उघडकीस आला आहे. शिक्षिकांच्या आळीपाळीने दांड्या मारण्याच्या सवयीमुळे शालेय वेळेत शाळेतील चिमुरडे विद्यार्थी चक्क समृद्धी महामार्गाच्या कडेला भंगार गोळा करण्यासाठी जात असल्याचा गंभीर प्रकार समोर आला आहे. या बेजबाबदारपणाचा जाब विचारणाऱ्या शालेय व्यवस्थापन समितीलाच शिक्षिकांनी नियमबाह्य पद्धतीने तडकाफडकी बरखास्त केल्याने संतापाची लाट उसळली आहे. खडकवाडी जिल्हा परिषद शाळेचे शालेय व्यवस्थापन समिती अध्यक्ष भरत कडू आणि सदस्यांनी शाळेची पाहणी केली असता, शाळेतील २ शिक्षिका सकाळी वेळेवर येत नसल्याचे आणि आळीपाळीने एक दिवसाआड गैरहजर राहत असल्याचे त्यांच्या निदर्शनास आले. जी शिक्षिका गैरहजर आहे तिच्या वर्गावर कोणाचेही नियंत्रण नसते. या भोंगळ कारभारामुळे विद्यार्थ्यांच्या सुरक्षिततेचा प्रश्न ऐरणीवर आला आहे. शाळेच्या वेळेत विद्यार्थी शाळा सोडून थेट समृद्धी महामार्गालगत भंगार गोळा करण्यासाठी जात असल्याचे विदारक चित्र अध्यक्षांनी पाहिले. ‘एसआयआर’च्या नावाखाली शिक्षिका शाळेतच फिरकत नसल्याचे समोर आले. “या दरम्यान महामार्गावर एखादी मोठी दुर्घटना घडली, तर याला जबाबदार कोण?” असा सवाल अध्यक्ष भरत कडू यांनी उपस्थित केला.
अध्यक्ष भरत कडू यांनी शिक्षिकांना समजावून सांगत कामकाजात सुधारणा करण्याची विनंती केली. मात्र, वेळेचे सर्व नियम धाब्यावर बसवत त्यांनी सुधारणा करण्याऐवजी अरेरावीची भाषा वापरली. “दुसऱ्या शिक्षिकेच्या वर्गाचा आणि माझा काही संबंध नाही,” असे बेजबाबदार उत्तर देत, “याबाबत जिथे तक्रार करायची तिथे करा, आमचं कोणी काही करू शकणार नाही,” अशी मुजोरीची भाषा त्यांनी वापरल्याचा आरोप भरत कडू यांनी केला आहे. आपल्या गैरप्रकारांना अध्यक्ष आणि समितीचे सदस्य अडसर ठरत असल्याचे लक्षात येताच, शिक्षिकांनी गावात राजकीय वाद आणि वैमनस्य निर्माण करण्याचा डाव रचला. स्वतःवरील गंभीर आरोपांपासून वाचण्यासाठी, जुलै २०२४ मध्ये स्थापन झालेल्या समितीचा ३ वर्षांचा कार्यकाळ पूर्ण होण्यापूर्वीच आणि कोणतेही शासकीय निकष न पाळता ३१ ऑक्टोबरला नवीन समितीचे पुनर्गठन करून टाकले. नवीन समिती निवडताना प्रत्येक पालकाला अजेंडा देणे आणि त्यानंतर ८ दिवसांनी सभा घेणे बंधनकारक असते. या सर्व नियमांना हरताळ फासून ही निवड कशी झाली, याचा खुलासा करण्याची मागणी अध्यक्ष भरत कडू व सदस्यांनी केली आहे. या संपूर्ण प्रकाराची तक्रार २ नोव्हेंबरला इगतपुरी पंचायत समितीचे गटशिक्षणाधिकारी यांच्याकडे करण्यात आली आहे. दिवाळीनंतर शाळा सुरू होताच कारवाई करण्याचे आश्वासन गटशिक्षणाधिकाऱ्यांनी दिले होते, मात्र अद्यापही संबंधितांवर कोणतीही कारवाई न झाल्याने शिक्षण विभागाच्या भूमिकेवर प्रश्नचिन्ह उपस्थित केले जात आहे. या गंभीर प्रकरणाची दखल घेऊन दोषी शिक्षिकांवर तात्काळ निलंबनाची कारवाई करावी, यासाठी तक्रारीच्या प्रती शालेय शिक्षण मंत्री, शिक्षण सचिव, नाशिक जिल्हा परिषदेचे शिक्षणाधिकारी आणि इगतपुरी गटशिक्षणाधिकारी यांना पाठवण्यात आल्या आहेत. आता शिक्षण विभाग या मुजोर शिक्षिकांवर कारवाई करणार की त्यांना पाठीशी घालणार, याकडे संपूर्ण तालुक्याचे लक्ष लागले आहे.