इगतपुरीनामा न्यूज – व्यसनमुक्ती क्षेत्रात उल्लेखनीय कार्य करणाऱ्या इगतपुरी येथील कै. आण्णासाहेब नारायण पाटील बहुउद्देशीय संस्था संचलित मन:शांती व्यसनमुक्ती केंद्राला राज्यस्तरीय सन्मान प्राप्त झाला आहे. संस्था पातळीवरील पुरस्कार म्हणून इगतपुरीच्या मन:शांती व्यसनमुक्ती केंद्राला सन्मानचिन्ह व रोख ३० हजार रुपये देऊन गौरविण्यात आले. शासकीय कर्मचारी गटातून संस्थेचे संचालक हुकुमचंद दत्तात्रय पाटील यांना “राष्ट्रपिता महात्मा गांधी राज्यस्तरीय व्यसनमुक्ती सेवा पुरस्कार” प्रदान करण्यात आला. त्याचे सन्मानचिन्ह व रोख रुपये १५ हजाराचे पारितोषिक देण्यात आले. मुंबई येथील यशवंतराव चव्हाण प्रतिष्ठान येथे हा पुरस्कार सोहळा थाटामाटात पार पडला. सामाजिक न्याय विभागामार्फत आयोजित या कार्यक्रमात राज्यभरातील १३ संस्थांसह व्यसनमुक्ती क्षेत्रात उल्लेखनीय कामगिरी करणाऱ्या मान्यवरांचा गौरव करण्यात आला.
मन:शांती व्यसनमुक्ती केंद्राच्या माध्यमातून आदिवासी भागात सातत्याने व्यसनमुक्तीबाबत जनजागृती केली जाते. शाळा, महाविद्यालये, ग्रामीण भागात जाऊन प्रबोधनात्मक नाटिका, पथनाट्य, कीर्तन, चर्चासत्रे यांद्वारे समाजात व्यसनमुक्तीचा संदेश दिला जातो. ६ ते १८ वयोगटातील मुलांमध्ये जीवन कौशल्यांच्या माध्यमातून सुसंस्कार घडविण्याचे कार्यही संस्थेकडून राबवले जाते. यावेळी केंद्रीय सामाजिक न्याय राज्यमंत्री रामदास आठवले, राज्याचे सामाजिक न्याय मंत्री संजय शिरसाट, विधान परिषदेचे सभापती राहुल नार्वेकर, माजी गृहराज्यमंत्री सिद्धराम मेहेत्रे, आमदार तुषार राठोड, प्रधान सचिव हर्षदीप कांबळे, समाजकल्याण आयुक्त दीपा मुधोळ मुंढे, संस्थेच्या अध्यक्षा उषाबाई पाटील, सचिव मच्छिंद्रनाथ पाटील, लताबाई पाटील, किरण पवार, आकाश पाटील, दीपक बोराडे, अरुण पाटील, दीपक भदाणे आदी उपस्थित होते. या यशाबद्दल आमदार रोहित पवार, समाजकल्याण अधिकारी डॉ. संजय शिंदे, मदन बढे, महेंद्र होरशील, मधुकर सूर्यवंशी, सुनंदा सूर्यवंशी, राजेंद्र पाटील, निवृत्ती तळपाडे आदी मान्यवरांनी अभिनंदन केले आहे.
“महात्मा गांधी राज्यस्तरीय व्यसनमुक्ती सेवा पुरस्कार मिळाल्यामुळे आमची जबाबदारी अधिक वाढली आहे. यापुढे व्यसनमुक्तीच्या कार्याला अधिक वेग देऊन समाजातून व्यसनाचे समूळ उच्चाटन करण्यासाठी आम्ही कटिबद्ध आहोत. "
- श्री. हुकुमचंद पाटील, पुरस्कारार्थी
