इगतपुरीनामा न्यूज – इगतपुरी नगरपरिषद हद्धीतील तळेगाव येथे २० कोटी किमतीची शिवसृष्टी उभारण्याबाबत उपमुख्यमंत्री तथा नगरविकास मंत्री ना. एकनाथ शिंदे यांनी अनुकूलता दर्शवली आहे. शिवसृष्टी उभारून महाराष्ट्राचे आराध्य दैवत छत्रपती शिवाजी महाराजांचा इतिहास या शिवसृष्टीच्या रूपाने जगभरात पोहोचावा. इथल्या डोंगर रांगां प्रती प्रेम असलेले अनेक पर्यटक, ट्रेकर्स यांना प्रेरणा मिळावी यासाठी इगतपुरीच्या नगराध्यक्षा सौ. शालिनी संजय खातळे, सामाजिक कार्यकर्ते संजय खातळे, राष्ट्रवादीचे प्रदेश सरचिटणीस गोरख बोडके यांनी उपमुख्यमंत्री ना. एकनाथ शिंदे यांची मंत्रालयात भेट घेतली. यावेळी ना. एकनाथ शिंदे यांनी हा प्रकल्प अत्यंत महत्वाकांक्षी असल्याचे सांगत नगरविकास विभागाला तातडीने प्रस्ताव सादर करण्याच्या सूचना दिल्या. इगतपुरी शहर पर्यटनाच्या माध्यमातून राज्याच्या नकाशावर येण्यासाठी महाराष्ट्र शासन सकारात्मक असून नाशिक जिल्ह्याचे हे प्रवेशद्वार दिमाखदार करण्यासाठी व्यक्तिशः लक्ष घालण्यात येईल असे आश्वासन उपमुख्यमंत्री ना. एकनाथ शिंदे यांनी यावेळी दिले.
इगतपुरी ‘क’ वर्ग नगरपरिषद असून नगरपरिषदेचा आर्थिक स्रोत मर्यादित आहे. मुंबई व नाशिक यांच्यामधील महत्वाचे इगतपुरी शहर आहे. येथे पर्यटनाच्या दृष्टीने महत्व दिवसेंदिवस वाढत आहे. इगतपुरीला अनेक बाहेरील राज्याच्या रेल्वे गाड्यांचा महत्त्वाचा थांबा आहे. पावसाळ्यात राज्यासह देशातील विविध भागातून पर्यटक इथल्या डोंगररांगा, धबधबे व निसर्ग पाहण्यासाठी कायमच येत असतात. इगतपुरी नगरपरिषदेचा आपल्या हद्धीतील तळेगाव येथे शिवसृष्टी उभारण्याचा मानस आहे. गट नंबर ४२२ मध्ये शिवसृष्टी उभारण्यासाठी नगरविकास विभागाच्या तरतुदीतून २० कोटी रुपयांचा इतका निधी मिळण्याची मागणी नगराध्यक्ष सौ. शालिनी संजय खातळे यांनी केली. ह्या निधीतून इगतपुरी येथे भव्य शिवसृष्टी उभारल्यास इगतपुरी शहराला पर्यटनाच्या दृष्टीने देखील चालना मिळेल. या भागातील सामान्य नागरिकांना रोजगाराची संधी उपलब्ध होण्यास मदत होणार आहे असे सामाजिक कार्यकर्ते संजय खातळे म्हणाले.
