इगतपुरीनामा न्यूज – ११ डिसेंबरला वाडीवऱ्हे पोलीस ठाणे हद्दीत महामार्गावर गुजरात येथील फिर्यादी धर्मेंद्र पटेल व त्यांचे साथीदार स्कॉर्पिओमधुन ग्वालियर येथुन मुंबईकडे जात होते. यावेळी अज्ञात आरोपींनी संगनमताने वेगवेगळ्या गाड्यांमध्ये येवुन त्यांच्या गाडीला त्यांची वाहने आडवी लावत मारहाण केली. साक्षीदाराच्या डोळ्यात काहीतरी टाकुन त्याला बेशुध्द करून त्यांचे ताब्यातील स्कॉर्पिओ कारमधील रोख रक्कम ४ लाख ५० हजार रुपये जबरी चोरी करून चोरून नेले. याबाबत वाडीवऱ्हे पोलीस ठाण्यात गुन्हा दाखल करण्यात आलेला होता. पोलीस अधीक्षक बाळासाहेब पाटील, अपर पोलीस अधीक्षक आदित्य मिरखेलकर यांनी ह्या गुन्ह्यातील आरोपींच्या गुन्हा करण्याच्या पध्दतीवरून आरोपींचा शोध घेणेकामी मार्गदर्शन केले होते. त्यानुसार स्थानिक गुन्हे शाखेचे पोलीस निरीक्षक रविंद्र मगर, वाडीवऱ्हेचे पोलीस निरीक्षक भगवान मथुरे यांनी घटनास्थळांवर भेटी, फॉरेन्सिक टिम, श्वान पथक यांच्या मदतीने घडलेल्या परिस्थितीची पाहणी केली. विविध तपास पथके तयार करून तपासकामी पाठवण्यात आली होती. तपास पथकाने मुंबई आग्रा महामार्ग, घटनास्थळावरील उपलब्ध भौतिक व तांत्रिक पुराव्यांवे विश्लेषण, गुन्ह्यातील आरोपींची देहबोली, बोली भाषा यावरून तपास केला. यावरून आरोपी केरळ राज्यातील असल्याचे प्रथमदर्शनी निदर्शनास आले होते. त्यावरून वरिष्ठांच्या मार्गदर्शनानुसार परराज्यातील तपास परवानगीने दोन पथके केरळमध्ये पाठवण्यात आली होती.
त्यानुसार केरळच्या त्रिसुर जिल्ह्यातील कोंडुगुल्लुर येथून बाबु व्ही. आर. रमन पिल्ले, वय ५४, रा. चंगमनाडु, जि. एर्नाकुलम, केरळ, आकाश एस. कांत श्रीकांत, वय १८, रा. कोडुंगल्लोर, जि. त्रिसुर, केरळ या दोघांना ताब्यात घेण्यात आले. यांच्याकडे चौकशी केली असता, त्यांनी व त्यांच्या इतर साथीदारांनी डिसेंबर महिन्यात वाडीवऱ्हे परिसरात एका स्कॉर्पिओवरील चालक व त्याच्या साथीदाराला मारहान करून कारमधील रोख रक्कम जबरीने चोरल्याची कबुली दिली. ह्या आरोपींकडे अधिक चौकशी केल्यावर त्यांचे इतर साथीदार पुन्हा नाशिक जिल्ह्यात लुटमारीच्या उद्देशाने महाराष्ट्र राज्यात गेले असल्याबाबत सांगितले. त्यानुसार खात्री केली असता, त्यांचे साथीदार हे महामार्गावरील वाहनांची लुट करण्याचे उद्देशाने सिन्नर तालुक्यात नाशिक पुणे महामार्गालगत चारचाकी वाहनांमध्ये दबा धरून थांबलेले असल्याची खात्री झाल्याने, स्थानिक गुन्हे शाखा व सिन्नर पोलिसांच्या पथकांनी संयुक्तपणे छापा टाकला. यातील आरोपींचा पाठलाग करून त्यांच्या ताब्यातील मुद्देमालासह शिताफीने ताब्यात घेतले आहे. नियास मुहम्मद अली, मुहम्मद आदिल अब्दुल माजिद, अनिलकुमार करूणाकरा कुरूप, सबरीनाथ विनु के. व्ही., आसिफ हमीद, अब्दुल हमीद नासर, शहारूख पी. एस. शहाजहान, सिरल बाबु मजिद, अरुणकुमार के., सबीश व्ही. एस. संतोष हे आरोपी ताब्यात घेण्यात आले. त्यांचे इतर ५ साथीदार फरार झाले आहेत. आरोपी हे केरळ राज्यातील सराईत गुन्हेगार असुन त्यांच्याकडून महाराष्ट्र राज्यासह, आंध्रप्रदेश, मध्यप्रदेश, उत्तरप्रदेश राज्यातील महामार्गावर वाहने अडवुन लुटमार केल्याचे आणखी गुन्हे उघडकीस येण्याची शक्यता आहे.
आरोपी हे घातक हत्यारे व मिरची पुड असे कब्जात बाळगुन रस्त्यावर अथवा परिसरात दरोडा टाकण्याचे तयारी असतांना मिळुन आले आहे. त्यांच्या कब्जातुन लोखंडी तलवार, लोखंडी गुप्ती, कोयता, टोकदार चाकु, दोन हातोड्या, स्कु ड्रायव्हर, मिरची पुड व दरोडा टाकण्याचे इतर साहित्य, टायोटा इटियॉस कार,मारुती स्विफ्ट कार, होंडा सिटी कार अशी तीन वाहने व गुन्ह्यातील मोबाईल, एटीएम व क्रेडिट कार्ड असा १९ लाख ५५ हजार ३०० रुपये किंमतीचा मुद्देमाल जप्त करण्यात आला आहे. सदर आरोपींविरुद्ध सिन्नर पोलीस ठाण्यात गुन्हा दाखल करण्यात आला आहे. पोलीस अधीक्षक बाळासाहेब पाटील, अपर पोलीस अधीक्षक आदित्य मिरखेलकर यांच्या मार्गदर्शनानुसार स्थानिक गुन्हे शाखेचे पोलीस निरीक्षक रविंद्र मगर, सिन्नरचे पोलीस निरीक्षक हेमंतकुमार भामरे, वाडीवऱ्हेचे पोलीस निरीक्षक भगवान मथुरे, स्थागूशाचे सपोनि नितीन रणदिवे, सुदर्शन बोडके, शैलेश पाटील, सिन्नरच्या सपोनि रुपाली चव्हाण पोलीस अंमलदार प्रविण काकड, विनोद टिळे, संदिप नागपुरे, हेमंत गिलबिले, संतोष दोंदे, सतिष घुटे, नवनाथ शिरोळे, श्रीकांत गारूंगे, कैलास मानकर, प्रदिप बहिरम, बालाजी कुंटेवाड, केतन कापसे, नितीन गांगुर्डे, वाडीवऱ्हेचे शिरीष गांगर्डे, सिन्नरचे समाधान बोराडे, नितीन डावखर, कृष्णा कोकाटे, प्रशांत सहाणे, गाढवे, शिंदे, नवनाथ पवार, साळवे, पवार, साळवे यांच्या पथकांनी कारवाई करून दरोडा तयारी व जबरी चोरी असे २ गुन्हे उघडकीस आणलेले आहे.
