इगतपुरीनामा न्यूज – गडवाट परिवाराने दरवर्षीप्रमाणे याही वर्षी आदर्शवत शिवजयंतीच्या पायंड्याची परंपरा कायम ठेवली. दिवंगत गडवाटकरी कै. दर्शन विनायक झनकर याच्या कामाची पावती म्हणून त्याच्याच गावच्या शाळेत शिवजयंती सोहळा तेथील विद्यार्थी गावकऱ्यांसह साजरा केला. सोहळ्याची सुरुवात छत्रपतींच्या पालखीची ऐतिहासिक वातावरणात मिरवणूक काढण्यात आली. गावकर्यांनी पालखीचे आदरातिथ्य करत स्वागत केले. गडवाटकरी विजय निसाळ यांच्या संकल्पनेतून पै. पंढरीनाथ पाळदे व्यायामशाळेच्या पैलवानांनी सादर केलेल्या मल्लखांब प्रात्यक्षिकाने सर्वच उपस्थितांमध्ये उत्साह संचारुन गेला. जिजाऊ वंदनेने मुख्य सोहळ्यास प्रारंभ होऊन गडवाटच्या आजवरच्या कार्याची माहिती प्रा. उमेश शिंदे यांनी प्रास्ताविकातून दिली. प्रमुख अतिथी बीजमाता ममताबाई भांगरे यांनी आपल्या गडवाटच्या कार्याचा गौरव करत बीजसंवर्धन कार्याचा लेखाजोखा मांडला.
मुख्य मार्गदर्शक अजयदादा जाधवराव यांनी शिवजयंती स्वरुप, आजकाल इतिहासाकडे बघण्याची दृष्टी यावर आसूड ओढत सत्य इतिहासाचा अभ्यास करून शिवचरित्राद्वारे समाजोद्धार करण्यासाठी सर्वानी पुढे येऊन काम करण्याचे आवाहन केले. कै. दर्शनचे कौतुक करत त्याचे मातृ-पितृ, कुटुंब, गडकिल्ले, शिवभक्ती सर्वांपुढे आदर्श असल्याचे सांगितले. या कार्यक्रमात शहाजी महाराज, जिजाऊ, बाळ संभाजी, शिवाजी महाराज यांचे एकत्रित असलेले ऐतिहासिक चित्र प्रकाशित करण्यात आले. गडवाटच्या वेबसाईटचे उद्घाटन करण्यात आले. गुणवंत विद्यार्थ्यांचा विशेष सत्कार करत सर्व विद्यार्थ्यांना शालेय साहित्य वाटप करण्यात आले. डॉ नितीन बस्ते यांनी काढलेल्या गडकिल्ले ड्रोन छायाचित्रांचे प्रदर्शन सर्वांचे लक्ष वेधून घेत होते. गडवाटकरी योगेश नागरे यांच्या लयबद्ध सुत्रसंचालनातील सोहळ्यात अध्यक्षस्थानी मुख्याध्यापक परदेशी सर, आवारी, गडवाट संस्थेचे अध्यक्ष सुहास पवार, ग्रामस्थ, विद्यार्थी, शिक्षक, दर्शनचे कुटुंब आणि परिसरातील असंख्य नागरिक व राज्यभरातील गडवाटकरी उपस्थित होते, अशी माहिती संस्थेचे सदस्य भूषण पागेरे यांनी दिली.
