इगतपुरीनामा न्यूज – इगतपुरी तालुक्यातील पिंपळगाव डुकरा ग्रामपंचायतीला माझी वसुंधरा अभियान ५.० अंतर्गत नाशिक विभाग स्तरावर सर्वोत्तम कामगिरीसाठी पहिल्या क्रमांकाचे ५० लाखांचे पारितोषिक घोषित करण्यात आले आहे. राज्य शासनाने आज पिंपळगाव डुकरा ग्रामपंचायतीसह बक्षीसपात्र स्थानिक स्वराज्य संस्थांच्या नावाची घोषणा केली. १५०० लोकसंख्या गटात पिंपळगाव डुकरा गावाची उच्चत्तम कामगिरी बक्षीसपात्र ठरली. लवकरच राज्याचे मुख्यमंत्री ना. देवेंद्र फडणवीस, उपमुख्यमंत्री ना. सुनेत्रा पवार, उपमुख्यमंत्री एकनाथ शिंदे आणि अन्य मंत्री यांच्या उपस्थितीत पारितोषिक वितरण समारंभ होणार आहे. पिंपळगाव डुकरा प्रशासक साहेबराव देशमुख, ग्रामपंचायत अधिकारी हर्षिता पिळोदेकर यांना यावेळी सन्मानित केले जाईल. गावातील सर्व आदरणीय ग्रामस्थ, सर्व मार्गदर्शक लोकप्रतिनिधी, माजी सरपंच सर्व, ग्रामपंचायत सदस्य सर्व, सर्व ग्रामस्तरीय कर्मचारी, बंधू भगिनी यांनी आनंद व्यक्त करून पिंपळगाव डुकरा ग्रामपंचायतीला शुभेच्छा दिल्या आहेत. इगतपुरीचे गटविकास अधिकारी महेश वळवी, सहाय्यक गटविकास अधिकारी गोडे, विस्तार अधिकारी पडवी, ज्ञानेश्वर कऱ्हाळे, अहिरे यांनीही आनंद व्यक्त केला आहे. पृथ्वी, वायु, जल, अग्नी, आणि आकाश या निसर्गाशी संबंधित पंचतत्वांवर आधारित “माझी वसुंधरा अभियान” हे राज्यातील स्थानिक स्वराज्य संस्थांमध्ये २ ऑक्टोबर २०२० पासून राबविण्यास सुरवात झाली. “माझी वसुंधरा अभियान ५.० हे राज्यातील स्थानिक स्वराज्य संस्थांमध्ये १ जून २०२४ ते ३१ मार्च २०२५या कालावधीत राबविण्यात आले. माझी वसुंधरा अभियान ५.० मध्ये राज्यातील ४२२ नागरी स्थानिक संस्था व २७८९५ ग्रामपंचायती अशा एकूण २८३१७ स्थानिक संस्थांनी सहभाग घेतला होता.
