इगतपुरीनामा न्यूज – नाशिकच्या मार्शल आर्ट्स क्षेत्रासाठी एक ऐतिहासिक क्षण ठरला आहे. तायक्वांदो असोसिएशन ऑफ नाशिक डिस्ट्रिक्टची अधिकृत स्थापना करण्यात आली आहे. ३० मे २०२५ ह्या फिवासी ही संघटना धर्मादाय आयुक्त कार्यालयाकडून नोंदणीकृत करण्यात आली आहे. ही नव्याने स्थापन झालेली संघटना आता तायक्वांदो असोसिएशन ऑफ महाराष्ट्र (TAM) या राज्य संघटनेशी संलग्न झाली आहे. जी इंडियन तायक्वांदो, महाराष्ट्र ऑलिम्पिक असोसिएशन, इंडियन ऑलिम्पिक असोसिएशन, एशियन तायक्वांदो युनियन आणि वर्ल्ड तायक्वांदो फेडरेशन द्वारे मान्यताप्राप्त आहे. संघटनेच्या कार्यकारिणी सदस्यांची अधिकृत घोषणा करण्यात आली आहे. अध्यक्षपदी दिनेशकुमार विद्यासागर नायर, उपाध्यक्ष म्हणून प्रविण खंडेराव कदम, सचिवपदावर विशाल विजय जगताप, संयुक्त सचिव म्हणून आनंदराव माणिकराव सावरकर यांची निवड झाली आहे. खजिनदारपदी देवेंद्र राजेंद्र भावसार, संयुक्त खजिनदारपदी खंडू भागिरथ लहाने, कार्यकारिणी सदस्य म्हणून इम्रान वसीम शेख यांचीही निवड घोषित करण्यात आली.
संघटनेच्या स्थापनेनंतर लगेचच अध्यक्ष दिनेशकुमार नायर, सचिव विशाल जगताप यांनी नाशिक जिल्ह्यात तायक्वांदो खेळाच्या प्रचार प्रसारासाठी सक्रिय काम सुरू केले. विशेष म्हणजे १७ खेळाडूंनी कराड, महाराष्ट्र येथे झालेल्या नॅशनल रेफरी व ब्लॅकबेल्ट डान परीक्षा यशस्वीरीत्या पूर्ण करून जिल्ह्यासाठी उत्तम सुरुवात केली.या उल्लेखनीय यशाबद्दल TAM चे अध्यक्ष संदीप ओंबासे, महासचिव गफार पठाण, खजिनदार प्रसाद कुलकर्णी यांनी नाशिक संघटनेचे अभिनंदन केले. आगामी योजनेंतर्गत नाशिक जिल्हा तायक्वांदो असोसिएशनने पहिली सब-ज्युनिअर व सीनिअर जिल्हास्तरीय तायक्वांदो स्पर्धा जुलै २०२५ च्या पहिल्या आठवड्यात घेण्याचा निर्णय घेतला आहे. या स्पर्धेतील विजेते खेळाडू १९ ते २१ जुलै २०२५ दरम्यान होणाऱ्या महाराष्ट्र राज्य तायक्वांदो स्पर्धेत नाशिकचे प्रतिनिधित्व करतील. या उपक्रमाबद्दल बोलताना अध्यक्ष दिनेशकुमार नायर, सचिव विशाल जगताप म्हणाले, “नाशिक जिल्ह्यातील प्रत्येक भागात तायक्वांदो खेळाचा विकास करणे हे आमचे उद्दिष्ट असून, सर्व अॅकॅडमी व खेळाडूंनी जिल्हास्तरीय स्पर्धेत भाग घेऊन राज्यस्तरीय यश मिळवावे, असे आवाहन आम्ही करतो.” ही अधिकृत घोषणा नाशिक जिल्ह्याच्या तायक्वांदो क्षेत्रात एक नवे पर्व घेऊन आली असून जिल्ह्यातील खेळाडू, प्रशिक्षक व पंचांसाठी उत्तम संधी निर्माण होणार असल्याचे स्पष्ट झाले आहे
