इगतपुरीनामा न्यूज – पिंपळगाव मोर विविध कार्यकारी सेवा सहकारी संस्थेच्या २०२२ ते २०२७ काळासाठी संचालक मंडळ निवडीसाठी १५ मे २०२२ ला निवडणूक झाली होती. ह्या निवडणुकीत १२ संचालक निवडून आले परंतु ह्या संचालक मंडळाने ६० दिवसात निवडणूकीचा खर्च निवडणूक निर्णय अधिकारी यांच्याकडे सादर केला नाही. म्हणून संस्थेचे सभासद युवराज तुकाराम गातवे यांनी सहाय्यक निबंधक इगतपुरी यांचेकडे नोव्हेंबर २०२२ मध्ये तक्रार दाखल केली होती. तक्रारीच्या अनुषंगाने २३ मार्च २०२३ ला सहाय्यक निबंधक यांनी निकाल देऊन सर्व संचालकांना ३ वर्षासाठी अपात्र घोषित केले होते. ह्या निकालाविरुद्ध संचालक मंडळाने विभागीय सहनिबंधक नाशिक यांच्याकडे अपील दाखल केले होते. ह्या अपीलात विभागीय सहनिबंधक यांनी सुनावणी घेऊन सहायक निबंधक इगतपुरी यांनी प्रकरण फेर चौकशीसाठी जिल्हा उपनिबंधक सहकारी संस्था नाशिक यांच्याकडे पाठवले. त्यांनी सुनावणी घेऊन निवडणुकीचा खर्च सादर केला किंवा कसे याबद्दल चौकशी केली असता संचालक मंडळाने निवडणुकीचा खर्च मुदतीत निवडणूक निर्णय अधिकारी यांच्याकडे सादर केलेला नसल्याचे स्पष्ट झाले. त्यामुळे जिल्हा उपनिबंधक यांनी सहाय्यक निबंधक सहकारी संस्था इगतपुरी यांना तसे पत्र देऊन पुढील कार्यवाही करण्याचे आदेश दिले.
सहाय्यक निबंधक सहकारी संस्था इगतपुरी यांनी पुन्हा सुनावणी घेऊन ८ मे २०२४ ला नवीन आदेश पारित करून सर्व संचालकांना आदेशापासून पुढील तीन वर्षापर्यंत निवडणूक लढविण्यास अपात्र घोषित केले. संचालक मंडळाने पुन्हा ह्या आदेशाला आव्हान देऊन विभागीय सहनिबंधक सहकारी संस्था नाशिक विभाग यांच्याकडे ८ जुलै २०२४ ला अपील दाखल केले. अपीलामध्ये अनेक सुनावण्या घेऊन दोन्ही पक्षकारांना आपली बाजू मांडण्याला संधी देण्यात आली. त्यानुसार २ जानेवारी २०२५ ला विभागीय सहनिबंधक सहकारी संस्था नाशिक विभाग यांनी निकाल देऊन सहाय्यक निबंधक सहकारी संस्था इगतपुरी यांचा निकाल कायम केला. ह्या निकालाद्वारे संचालक मंडळाची अपात्रता कायम करण्यात आली आहे. त्यामुळे ह्या संचालक मंडळातील अपात्र संचालकांना यापुढे तीन वर्ष कोणत्याही सहकारी संस्थेचा सभासद होण्यास किंवा सहकारी संस्थेची निवडणूक लढविण्यास अपात्र करण्यात आलेले आहे. अपात्र करण्यात आलेल्या संचालकांत सुरेश संतु काळे, विजय भिका पवार, संतु नामदेव काळे, उत्तम एकनाथ बेंडकोळी, दत्तु चंदर पगारे, काळू देवजी मेंगाळ, मनोहर पोपट बेंडकोळी, बाळू गोविंद बेंडकोळी, मिराबाई कचरू काळे, कौशाबाई संतु बेंडकोळी, गोरख बाजीराव काळे यांचा समावेश आहे.
