भास्कर सोनवणे : इगतपुरीनामा न्यूज – लोकसभा आणि विधानसभा निवडणुकीमुळे इगतपुरी तालुक्यातील अनेक महत्वपूर्ण ग्रामपंचायतींच्या निवडणुका पुढे ढकलण्यात आल्या होत्या. आता निवडणुका घेण्यासाठी कोणतीही अडचण नसल्याने लवकरच ह्या निवडणुका घोषित होण्याची शक्यता वाढली आहे. इगतपुरी तालुक्यातील ६५ ग्रामपंचायत निवडणुकांची रणधुमाळी आगामी काळात सुरु होणार असल्याची चिन्हे आहेत. सध्या ग्रामपंचायतींचा कारभार प्रशासकांच्या हातात असून यामुळे अनेक गावपुढाऱ्यांची गोची झालेली आहे. ह्या निवडणुकीसाठी सर्वांनी पूर्वतयारी आधीपासूनच केलेली आहे. गावाची सत्ता अबाधित राखण्यासाठी आणि सत्तेचे परिवर्तन करण्यासाठी ग्रामीण भागात व्युव्हरचना करण्यात आलेली आहे. सध्या तालुका प्रशासनही मोकळे झाले असल्याने राज्य निवडणूक आयोगाकडून राज्यभरात एकाचवेळी निवडणूक कार्यक्रम घोषित होऊ शकतो. महायुतीला सर्वत्र चांगले वातावरण असल्याने इगतपुरी नगरपरिषद, पंचायत समिती आणि जिल्हा परिषद निवडणुकाही होण्याची शक्यता आहे. कदाचित ग्रामपंचायत निवडणुका मागे ठेवून अन्य निवडणुका आधी घेतल्या जाऊ शकतात.
इगतपुरी तालुक्यातील रायांबे, शेवगेडांग, धार्णोली, मुरंबी, बेलगांव कुऱ्हे, उभाडे, मालुंजे, कांचनगांव, खैरगांव, खडकेद, बारशिंगवे, पिंपळगांव मोर, वाकी, पिंपळगांव भटाटा, मायदरा धानोशी, इंदोरे, धामणी,अधरवड, कावनई, आहुर्ली, म्हसुर्ली, कोरपगांव, पाडळी देशमुख, नांदुरवैद्य, देवळे, समनेरे, सोनोशी, मांजरगांव, शेणवड बुद्रुक, खंबाळे, साकुर, आंबेवाडी, त्रिंगलवाडी, वाळविहीर, सांजेगांव, वाडीवऱ्हे, कुऱ्हेगांव, नांदगांव बुद्रुक, जानोरी, पिंपळगांव घाडगा, घोटी बुद्रुक, पिंप्री सद्रोद्दीन, भावली खुर्द, तळोशी, चिंचलेखैरे, अडसरे बुद्रुक, बेलगांव तऱ्हाळे, माणिकखांब, काळुस्ते, खेड, गोंदे दुमाला, मुकणे, पिंपळगांव डुकरा, घोटी खुर्द, भरविर खुर्द, शेणीत, वाघेरे, बोर्ली, मानवेढे, कुरुंगवाडी, आवळखेड, टाकेद बुद्रुक, धामणगांव, निनावी, टाकेद खुर्द ह्या ६५ ग्रामपंचायतींची मुदत संपलेली आहे. आगामी काही काळात ह्या गावांची निवडणूक घोषित होईल असा अंदाज आहे. ग्रामीण भागात ह्या निवडणुकांची सर्वांना चांगली प्रतीक्षा आहे. विधानसभा निवडणुकीमुळे ग्रामीण भागात उत्साह असून निवडणुका चांगल्याच चुरशीच्या होतील असेही बोलले जाते आहे.