लक्ष्मण सोनवणे : इगतपुरीनामा न्यूज – महाराष्ट्र शासन कृषि विभाग कृषी तंत्रज्ञान व्यवस्थापन यंत्रणा आत्मा नाशिक व महिला विकास महामंडळ ( मविम ) नाशिक यांच्या संयुक्त विद्यमाने डोंगरे वसतिगृह मैदान गंगापूर रोड नाशिक येथे १० ते १४ फेब्रुवारी पर्यंत नाशिक कृषी महोत्सवाचे आयोजन करण्यात येत आहे. कृषी महोत्सवात प्रवेश विनामूल्य असल्याने शेतकरी आणि नागरिकांनी या महोत्सवात सहभाग घ्यावा असे आवाहन आत्माचे प्रकल्प संचालक राजेंद्र निकम, मविमचे जिल्हा समन्वय अधिकारी संजय गायकवाड यांनी केले आहे. या महोत्सवात २०० पेक्षा जास्त स्टॉल्स असणार आहेत. कृषी विभाग व इतर सलग्न विभागाच्या शासकीय योजनांची माहिती शेतकऱ्यांपर्यंत पोहचविण्यासाठी शासकीय दालने, शेतकऱ्यांचा शेतमाल थेट शहरी ग्राहकांच्या घरात पोहचावा यासाठी शेतकरी ते ग्राहक थेट शेतमाल विक्री, सेंद्रिय शेतमाल विक्री, आधुनिक शेती औजारांचे प्रदर्शन, शेतकरी गट, शेतकरी उत्पादक कंपनी, मविम अंतर्गत महिला बचतगट यांच्यामार्फत उत्पादित केलेले प्रक्रियायुक्त पदार्थ विक्रीसाठी स्टॉल उपलब्ध करून देण्यात येणार आहेत. शेतकऱ्यांसाठी विविध शेती पद्धती, प्रक्रिया उद्योग, महिला परिसंवाद, आंतरराष्ट्रीय पौष्टीक तृणधान्य वर्षाच्या अनुषंगाने विविध विषयांवर परिसंवाद कार्यक्रमाचे आयोजन महोत्सवादरम्यान करण्यात येणार आहे. महाराष्ट्राची ग्रामीण खाद्य संस्कृती दर्शविणारे विविध खाद्य पदार्थ दर्शविणारे विविध खाद्य पदार्थ विक्रीचे स्टॉल या प्रदर्शनात असणार आहेत. कृषी तंत्रज्ञान व्यवस्थापन यंत्रणा आत्मा अंतर्गत नाशिक जिल्ह्यात उत्कृष्ट काम करणारे शेतकरी, शेतकरी गट, शेतकरी उत्पादक कंपनी, कृषी विस्तारक, कृषी क्षेत्रातील नव उद्योजक यांना पुरस्काराने सन्मानित केले जाणार आहे.