कवी : प्रकाश पाटील कवठेकर, इगतपुरी
“असं कसं देवा तू,
माणसांवर रुसला !
अर्ध्या वाटेत सोडून
म्हणतो आपला करार कसला ? !!
गाभाऱ्यातून बाहेर ये
तुला आम्ही हिशोब देतो !
किती वर्षाचे आयुष्य दिले
तुला आठवण करून देतो !!
व्याज नको देऊ
मुद्दल तरी जगू दे !
चाळीस वर्षे ठरलं होतं
माणूस म्हणून जगू दे !!
घोड्याचं आयुष्य तू
माणसांना व्याजात दिलं !
कसं सांगू तुला ते
किती धावपळीत गेलं !!
आता नाही तुला
जगण्यासाठी साकडं घालायचं !
उंटाचं आयुष्य परत घे
आम्हाला कुबड काढून नाही चालायचं !!
लोभापायी करून बसलो
आयुष्य मागून पाप !
माकडा परि बघत बसलो
नभाकडे टकमक टकमक !!
आयुष्याचा करार आपला
अजून संपला नाही !
व्हायरस पाठवून वसुली करणे
हे तुला शोभत नाही !!
पाहवत नाही डोळ्यांना या
दुःख हृदयी भरतो !
दार उघड गाभाऱ्याचे
तुझे चरण स्पर्श करतो !!
स्वार्थासाठी जगला माणूस
रूप तुझे आता कळू दे !
माणसाला माणुसकीने
जगण्याची संधी आता मिळू दे !!
( कवी प्रकाश पाटील कवठेकर राष्ट्रीय पातळीवरील नामवंत चित्रकार असून इगतपुरी पंचायत समिती अंतर्गत कोरपगाव येथे ग्रामसेवक म्हणून कार्यरत आहेत. )