इगतपुरीनामा न्यूज – इगतपुरी तालुक्यात सध्या शेतीचा हंगाम अंतिम टप्प्यात असतानाच ग्रामीण भागात डिझेलचा मोठा तुटवडा निर्माण झाल्याने शेतकरी आणि अर्थमूव्हर्स व्यावसायिक हवालदिल झाले आहेत. यासह प्रशासनाने ड्रममध्ये डिझेल भरण्यावर निर्बंध घातल्याने यंत्रसामग्री बंद पडण्याची भीती निर्माण झाली आहे. प्रशासनाच्या आदेशानुसार पंपांवर ड्रममध्ये डिझेल देताना कडक निर्बंध लादण्यात आलेले आहेत. डिझेल मिळवण्यासाठी शेतकरी असल्याचे पुरावे आणि ट्रॅक्टरचा क्रमांक देणे अनिवार्य करण्यात आले आहे. इतके सर्व पुरावे देऊनही केवळ २ ते ३ हजार रुपयांपर्यंतच डिझेल मिळत असल्याने शेतकरी व व्यावसायिकांच्या दैनंदिन गरजा पूर्ण होत नाहीत. या प्रश्नाच्या सोडवणुकीसाठी नाशिक जिल्हा अर्थमूव्हर्स असोसिएशनचे संचालक मोहन बऱ्हे यांनी इगतपुरीचे तहसीलदार अभिजित बारवकर यांना वारंवार संपर्क साधला मात्र त्यांनी प्रतिसाद दिला नाही. श्री. बऱ्हे यांनी सांगितले की, “सध्या शेतीच्या कामांचा शेवटचा सीजन सुरू आहे. अशा महत्त्वाच्या काळात डिझेलअभावी आमची यंत्रसामग्री जागेवरच उभी राहत आहे. यामुळे वेळेवर कामे पूर्ण न होऊन मोठे आर्थिक नुकसान सोसावे लागत आहे.” डिझेलच्या या तुटवड्यामुळे निर्माण झालेली कोंडी फोडण्यासाठी आता व्यावसायिकांनी एकवटण्याचा निर्णय घेतला आहे. मोहन बऱ्हे म्हणाले की, या समस्येवर ठोस तोडगा काढण्यासाठी सर्वांनी एकत्र येऊन जिल्हाधिकाऱ्यांची भेट घेतली जाणार आहे. प्रशासनाने यावर तात्काळ योग्य तो मार्ग काढून ग्रामीण भागातील इंधन पुरवठा सुरळीत करावा, अशी आग्रही मागणी असोसिएशनतर्फे करण्यात आली आहे.
