इगतपुरीनामा न्यूज – नानाजी देशमुख कृषी संजीवनी प्रकल्प (पोखरा) अंतर्गत इगतपुरी तालुक्यातील पोखरा गावांमध्ये हवामान अनुकूल तंत्रज्ञानाचा प्रसार व्हावा, या हेतूने कवडदरा येथे रुंद सरी वरंबा तयार करणे व त्यावर टोकन पद्धतीने लागवड करण्याचे विशेष प्रात्यक्षिक आयोजित करण्यात आले होते. हे प्रात्यक्षिक स्थानिक शेतकरी गणेश रंगनाथ रोंगटे यांच्या शेतावर घेण्यात आले. यावेळी उपस्थित शेतकरी बांधवांना मंडळ कृषी अधिकारी एस. पी. पाटील यांनी मार्गदर्शन केले. हवामान बदलाच्या काळात जमिनीतील ओलावा टिकवून ठेवण्यासाठी आणि उत्पादनात वाढ करण्यासाठी ‘बेड’ पद्धत कशी फायदेशीर ठरते याविषयी तसेच शून्य मशागत पद्धत व आंतरपीक पद्धत यावर त्यांनी प्रकाश टाकला. या प्रसंगी उपकृषी अधिकारी एन. एस. पवार, प्रकल्प समन्वयक संदिप एम. गोर्डे, सहाय्यक कृषी अधिकारी व्ही. आर. भुसारे यांनी टोकन पद्धतीने लागवड केल्यामुळे बियाण्यांची होणारी बचत आणि पिकाची जोमदार वाढ या तांत्रिक बाबी समजावून सांगितल्या. या मोहिमेत समूह सहाय्यक प्रतिक्षा मिंड, कृषी ताई शिल्पा रोंगटे यांचे मोलाचे सहकार्य लाभले. कवडदरा परिसरातील मोठ्या संख्येने शेतकरी बांधव या नाविन्यपूर्ण तंत्रज्ञानाची माहिती घेण्यासाठी उपस्थित होते. ‘पोखरा’ योजनेचे हे तंत्रज्ञान जास्तीत जास्त शेतकऱ्यांपर्यंत पोहोचवण्यासाठी कृषी विभागाकडून नियोजनबद्ध प्रयत्न केले जात आहेत.
