इगतपुरीनामा न्यूज – साडेतीन शक्तीपीठांपैकी अर्ध्य पीठाचा महिमा असलेले कळवण तालुक्यातील श्री सप्तश्रृंगी निवासिनी देवी ट्रस्टच्या मंडळावर विश्वस्त म्हणून विष्णू त्र्यंबकराव वारुंगसे यांच्या नियुक्तीचा आदेश प्रधान जिल्हा व सत्र न्यायाधीश न्या. एस. डी. जगमलानी गुरुवारी काढला. यात प्रथमच इगतपुरी तालुक्यातील भूमिपुत्राला स्थान देण्यात आल्याने सर्वत्र आनंद व्यक्त करण्यात आला. महाराष्ट्रासह देशातील भाविकांचे श्रद्धास्थान असलेल्या सप्तश्रृंगी देवी संस्थानच्या विश्वस्तांची मुदत संपल्याने पुढील पाच वर्षासाठी नव्याने विश्वस्त मंडळ नेमणुकीसाठी जिल्ह्यातील पात्र उमेदवाराकडून अर्ज मागविण्यात आले होते. प्रधान जिल्हा व सत्र न्यायाधीश कार्यालयात मुलाखती घेण्यात आल्या. उमेदवारांच्या मुलाखती व परिचय पत्राचा विचार करुन निवड समितीने केलेल्या शिफारशीनुसार विष्णू वारुंगसे यांची निवड करण्यात आली. विष्णू वारुंगसे हे इगतपुरी तालुक्यातील बेलगाव तऱ्हाळे येथील भूमिपुत्र असून ते शासकीय लेखापरीक्षक आहेत. पारमार्थिक वारसा लाभलेल्या कुटुंबात त्यांचा जन्म झालेला आहे. प्रेरणा मित्र मंडळाच्या माध्यमातून देशभरातील सर्व शासकीय अधिकाऱ्यांना एका छताखाली आणण्यात त्यांचा सिंहाचा वाटा आहे. गल्लीपासून दिल्लीपर्यंत त्यांचा सर्व क्षेत्रातील अधिकारी आणि मान्यवर व्यक्तींशी त्यांचा जिव्हाळ्याचा संपर्क आहे. राष्ट्रवादी काँग्रेस अजित पवार गटाचे इगतपुरी तालुकाध्यक्ष पांडुरंग वारुंगसे यांचे ते बंधू आहेत. विश्वस्त म्हणून झालेली निवड आई सप्तश्रुंगी आणि आईवडील यांच्या विशेष कृपेने झाल्याची भावना विष्णू वारुंगसे यांनी व्यक्त केली.
