इगतपुरीनामा न्यूज – इगतपुरी येथील लिटल ब्लॉसम शाळेच्या मैदानात पहिलीतील विद्यार्थ्यावर चारचाकी वाहन चढवून गंभीर दुखापत झाल्याची धक्कादायक घटना १८ फेब्रुवारीला घडली. याप्रकरणी विद्यार्थ्याच्या वडिलांनी इगतपुरी पोलीस ठाण्यात फिर्याद दिली आहे. त्यानुसार कारचालक शिक्षक यश कदम, मुख्याध्यापिका श्रीमती मंत्री, त्यांचे पती पप्पू मंत्री या तिघांवर आणि शाळा व्यवस्थापन समितीविरोधात गुन्हा दाखल झाला आहे. फिर्यादी कुंडलिक काळू डावखर, रा. गिरणारे, इगतपुरी यांनी सांगितले की, त्यांचा मुलगा हर्ष कुंडलिक डावखर हा इयत्ता पहिलीमध्ये लिटल ब्लॉसम स्कूल, इगतपुरी येथे शिक्षण घेत आहे. १८ फेब्रुवारीला दुपारी त्याला शाळेच्या मैदानात सफेद रंगाच्या चारचाकी वाहनाने धडक दिली. शाळेशी संलग्न असणारे यश कदम हे शिक्षक कार चालवत होते. अपघातानंतर जखमी विद्यार्थ्याला तातडीने हॉस्पिटलला उपचारासाठी दाखल करण्यात आले. नेण्यात आले. त्याच्यावर उपचार सुरु असून त्याची प्रकृती सध्या स्थिर आहे.
अपघाताबाबत सुरुवातीला शाळा प्रशासनाने चुकीची माहिती दिली. शाळेच्या सुरक्षितता नियमावलीचे (एस.ओ.पी.) पालन करण्यात आले नाही. पोलिसांत तक्रार दिल्यास मुलाच्या शैक्षणिक भवितव्यावर परिणाम होईल, अशी भीती दाखवून दमदाटी केल्याचा गंभीर आरोप फिर्यादी कुंडलिक डावखर यांनी केला आहे. या घटनेमुळे शाळा परिसरातील सुरक्षा व्यवस्थेबाबत प्रश्न उपस्थित झाले असून पालकांमध्ये तीव्र संताप व्यक्त होत आहे. शाळेच्या मैदानात वाहनांची ये-जा कोणत्या नियमांनुसार होते, याची चौकशी करून दोषींवर कठोर कारवाई करावी अशी मागणी होत आहे. जखमी विद्यार्थ्याला न्याय मिळावा, शाळांमधील सुरक्षा व्यवस्था अधिक कडक व्हावी, अशी अपेक्षा नागरिकांकडून व्यक्त होत आहे.
