इगतपुरीनामा न्यूज – नाशिक शिक्षण प्रसारक मंडळाच्या कला व वाणिज्य महाविद्यालय, इगतपुरी येथील विद्यार्थ्यांनी आपल्या कृतीतून पर्यावरण सुरक्षेचा एक उत्तम वस्तुपाठ घालून दिला आहे. दरवर्षीप्रमाणे यावर्षीही विद्यार्थ्यांनी रद्दी कागदांपासून आकर्षक व उपयुक्त पिशव्या (पेपर बॅग्ज) तयार करून घाटनदेवीच्या प्रसिद्ध यात्रेत दुकानदारांना व भाविकांना त्यांचे वाटप केले. या उपक्रमाच्या माध्यमातून त्यांनी प्लास्टिकमुक्तीसह पर्यावरण जाणीव जागृतीचा महत्त्वपूर्ण संदेश दिला. पर्यावरणाचा समतोल राखणे आणि नागरिकांमध्ये प्लास्टिकच्या वापराविरुद्ध जागरूकता निर्माण करणे या मुख्य उद्देशाने या उपक्रमाचे आयोजन करण्यात आले होते. विद्यार्थ्यांनी स्वतः तयार केलेल्या कागदी पिशव्या यात्रेतील विविध स्टॉल्स आणि दुकानांवर विनामूल्य दिल्या. “प्लास्टिकच्या घातक पिशव्यांना पर्याय म्हणून कागदी व कापडी पिशव्यांचा वापर सहज शक्य आहे,” असा मोलाचा संदेश विद्यार्थ्यांनी यावेळी येणाऱ्या-जाणाऱ्या भाविकांना व स्थानिक व्यापाऱ्यांना दिला. महाविद्यालयाच्या प्राचार्या प्रा. प्रतिभा सोनवणे यांनी या अभिनव संकल्पनेची मांडणी करून विद्यार्थ्यांना मार्गदर्शन केले. तर प्रा. जयश्री भालेराव यांनी विद्यार्थ्यांकडून कागदी पिशव्या बनवून घेण्यासह या संपूर्ण कार्यक्रमाचे यशस्वी आयोजन केले. या स्तुत्य उपक्रमात महाविद्यालयातील विद्यार्थ्यांनी मोठ्या उत्साहाने सहभाग नोंदवला. प्राध्यापक वर्ग व प्राध्यापकेतर कर्मचाऱ्यांनीही या उपक्रमास उपस्थित राहून विद्यार्थ्यांना प्रोत्साहन दिले. विद्यार्थ्यांच्या या सामाजिक आणि पर्यावरणपूरक उपक्रमाचे घाटनदेवी यात्रेतील भाविक व इगतपुरीकरांकडून विशेष कौतुक होत आहे.
