इगतपुरीनामा न्यूज – अनोळखी मुलीचा कोणीतरी काहीतरी कारणावरून कोठेतरी खून करून तिचे प्रेत वाडीवऱ्हे पोलीस स्टेशन हद्दीतील सारूळ शिवारात निर्जन ठिकाणी आणून टाकले होते. वाडीवऱ्हे पोलिसांनी याबाबत शुक्रवारी गुन्हा दाखल केला होता. ह्या गुन्ह्याचा तपास पोलीस अधीक्षक बाळासाहेब पाटील, अप्पर पोलीस अधीक्षक आदित्य मिरखेलकर, उपविभागीय पोलीस अधिकारी हरीश खेडकर यांच्या मार्गदर्शनाखाली पोलीस निरीक्षक भगवान मथुरे हे स्वतः करत आहेत. ह्या गुन्ह्याच्या तपासादरम्यान राज्यभरातील बेपत्ता मुलींची माहिती घेत असतांना अकोला जिल्हा येथील सिव्हील लाईन पोलीस ठाण्यात दाखल गुन्ह्यातील बेपत्ता मुलीचे नाव संस्कृती असल्याची माहिती मिळाली. त्यामुळे पोलीस निरीक्षक मथुरे यांनी अधिक माहिती घेऊन मुलीचा फोटो सिव्हील लाईन पोलिसात बेपत्ता मुलीची खबर देणारे सतीश काळे यांना संपर्क करून दाखवला. त्यांनी गुन्ह्यातील मयत तरुणी त्यांची मुलगी संकृती सतीश काळे वय १६ वर्ष रा. सिंदखेडराजा ता. सिंदखेड राजा जि. बुलढाणा हिचा असल्याचे ओळखला. संस्कृती हल्ली अकोला येथे हॉस्टेलमध्ये शिक्षण घेत असल्याने तिला त्यांच्या कौटुंबिक मित्राचा मुलगा संशयित अथर्व गजाननराव देशमुख वय १९ रा. हनुमान गल्ली, दुसरबीड ता. सिंदखेड राजा याच्यावर संशय व्यक्त केला. त्यानुसार वाडीवऱ्हे पोलिसांनी तपासाचे चक्रे फिरवली. संशयित आरोपी अथर्व देशमुख याचा शोध घेत असतांना तो संदीप फाउंडेशन, महिरावणी नाशिक येथे शिक्षण घेत असून तो सिन्नर वावी परिसरात दुपार पासून फिरत असल्याची तांत्रिक माहिती मिळाली. त्यावरून त्या परिसरात शोध घेत असतांना बातमीदाराकडून संशयित आरोपी अथर्व देशमुख हा पुन्हा नाशिक मध्ये दिसल्याच्या माहिती आधारे रात्री उशिरा त्याचा सातपूर पोलिसांच्या मदतीने पोलीस निरीक्षक भगवान मथुरे पोलीस हवालदार बोराडे, गीते, सोनवणे, बस्ते यांनी सातपूर कॉलनी परिसरात त्याला ताब्यात घेतले. प्राथमिक चौकशी दरम्यान संशयित आरोपी अथर्व देशमुख संस्कृती काळे सोबत कौटुंबिक मैत्रीचे व प्रेमाचे संबंध होते. परंतु तिला त्याने इतर मुलासोबत पाहिल्याने त्याचा राग मनात धरून आरोपी अथर्व देशमुख याने त्याच्या साथीदारांच्या मदतीचे तिला सोबत घेऊन जाऊन चालत्या वाहनात कुठेतरी चाकू भोकसून तिचा खून केला. त्यानंतर प्रेताची विल्हेवाट लावण्यासाठी आणखी दोन साथीदारांच्या मदतीने सारूळ शिवारात संस्कृती काळे हिचे प्रेत आणून टाकले असल्याची माहित तपासात निष्पन झाली.आरोपी अथर्व यास व अथर्व याला मदत करणारा आरोपी सुमित देवानंद सानप वय १९ रा. गजानन मंदिराजवळ, भूमराला ता. लोणार, जि. बुलढाणा यांना ताब्यात घेबून अटक करण्यात आली आहे. उर्वरित आरोपींचा वाडीवऱ्हे पोलीस स्टेशन कडील अधिकारी अंमलदार शोध घेऊन त्यांना देखील अटक करीत आहेत.
