समाधान कडवे : इगतपुरीनामा न्यूज – इगतपुरीच्या पोदार इंटरनॅशनल स्कूलची विद्यार्थिनी अनुराधा अमोल बुधवंत हिने अखिल भारतीय सैनिक स्कूल प्रवेश परीक्षेत (AISSEE 2026) ३०० पैकी तब्बल २९६ गुण मिळवून संपूर्ण भारतातून प्रथम क्रमांक (AIR 1) पटकावण्याचा ऐतिहासिक बहुमान मिळवला आहे. विशेष म्हणजे, तिचा जुळा भाऊ अनिरुद्ध अमोल बुधवंत यानेही ३०० पैकी २८६ गुण मिळवत राष्ट्रीय स्तरावर आपली मोहोर उमटवली. एकाच घरातील या जुळ्या रत्नांनी इगतपुरीसह शिरापूर, जि. अ. नगरचे नाव देशाच्या नकाशावर कोरले आहे. या दैदीप्यमान यशामागे आई सौ. भाग्यश्री अमोल बुधवंत ग्राम महसूल अधिकारी इगतपुरी, वडील अमोल बुधवंत प्राथ. शिक्षक, शिदवाडी-कसारा यांचे कष्ट आणि संस्कारांची मोठी पुण्याई आहे. आई भाग्यश्री यांनी आपल्या कामाचा व्याप सांभाळत मुलांच्या अभ्यासाचे नियोजन केले, तर वडील अमोल यांनी दुर्गम शिदवाडी शाळेत ज्ञानदानाचे पवित्र कार्य करत असतानाच आपल्या मुलांचा स्पर्धा परीक्षेचा पाया भक्कम केला. या भावंडांच्या यशाची मालिका पहिलीपासूनच सुरू असून स्पर्धा परीक्षांमध्ये त्यांनी नेहमीच अव्वल स्थान राखले आहे. याच शैक्षणिक वर्षात त्यांनी SOF ऑलिम्पियाडमध्ये ५ सुवर्णपदके आणि एक आंतरराष्ट्रीय कांस्य पदक जिंकून पोदार इंटरनॅशनल स्कूलच्या गुणवत्तेवर शिक्कामोर्तब केले होते. या यशात आजी-आजोबा तुकाराम बुधवंत, कौशल्या बुधवंत यांचा आध्यात्मिक वारसा व संस्कारांचा मोठा वाटा आहे. भारतीय संरक्षण दलात अधिकारी होऊन देशसेवा करण्याचे स्वप्न उराशी बाळगणाऱ्या अनुराधा आणि अनिरुद्धच्या उत्तुंग यशाबद्दल संपूर्ण इगतपुरी, कसारा आणि पाथर्डी परिसरातून अभिनंदनाचा वर्षाव होत आहे.
