भास्कर सोनवणे : इगतपुरीनामा न्यूज – “इगतपुरीनामा न्यूज” कडून १० एप्रिलच्या बातमीत नव्याने आरक्षण काढले जाणार असल्याचा अंदाज व्यक्त केला होता. हा अंदाज सत्य असल्याचे आज स्पष्ट झाले आहे. इगतपुरी तालुक्यातील ५ मार्च २०२५ ते ४ मार्च २०३० ह्या कालावधीत मुदत संपणाऱ्या सर्व ९६ ग्रामपंचायतींच्या सरपंच पदाचे आरक्षण काढण्याचा कार्यक्रम २१ एप्रिलला सोमवारी दुपारी १२ वाजता इगतपुरी तहसीलदार कार्यालयात घेतला जाणार आहे. ह्या आरक्षणाच्या निश्चितीनंतर लगेचच महिलांसाठी स्वतंत्रपणे सरपंच पदांचे आरक्षण काढण्याचा कार्यक्रम बुधवारी २३ एप्रिलला दुपारी १२ वाजता काढला जाईल. आरक्षण निश्चित झाल्यावर काही दिवसात ग्रामपंचायत निवडणुकीची रणधुमाळी सुरु होईल असा अंदाज असून ग्रामीण राजकारण ढवळून निघणार आहे. सार्वत्रिक निवडणूका होणाऱ्या ग्रामपंचायतींमध्ये नवे आरक्षण लागू करायचे असल्याने तत्पूर्वी नव्या आरक्षणाची प्रक्रिया केली जात आहे. बदललेल्या आरक्षणामुळे गोची झालेल्या ग्रामीण राजकीय पदाधिकाऱ्यांना बदलणाऱ्या आरक्षणाचे डोहाळे लागलेले आहेत. इगतपुरी तालुक्यातील बिगर अनुसूचित, अंशतः अनुसूचित, पूर्णतः अनुसूचित क्षेत्रातील अनुसूचित जाती, अनुसूचित जमाती, नागरिकांचा मागास प्रवर्ग, सर्वसाधारण प्रवर्गाच्या ९६ सरपंच पदांसाठी आरक्षण काढण्यात येईल.आरक्षण बदलाच्या हालचालींमुळे गाव पुढाऱ्यांच्या आशा पल्लवित झाल्या आहेत. काढलेले आरक्षण सार्वत्रिक निवडणूक होणाऱ्या ग्रामपंचायतींना लागू केले जाणार आहे.
अनुसूचित क्षेत्रात असणाऱ्या टाकेघोटी, फांगुळगव्हाण, पिंपळगांव मोर, आंबेवाडी, आवळखेड, कुशेगांव, कऱ्होळे, वाकी, त्रिंगलवाडी, टाकेद बुद्रुक, मोगरे, अडसरे खुर्द, पिंपळगांव भटाटा, वाळविहीर, धामणगांव, धारगांव, भावली बुद्रुक, मायदरा धानोशी, घोटी बुद्रुक, टाकेद खुर्द, नागोसली, भरवज, इंदोरे, पिंप्री सद्रोद्दीन, ओंडली, आवळी दुमाला, धामणी, भावली खुर्द, आडवण, वासाळी, अधरवड, तळोशी, उंबरकोन, रायांबे, आहुर्ली, चिंचलेखैरे, सोमज, शेवगेडांग, म्हसुर्ली, अडसरे बुद्रुक बोरटेंभे, धार्णोली, कोरपगांव, बेलगांव तऱ्हाळे, नांदगांव सदो, उभाडे, देवळे, काळुस्ते, तळोघ, कांचनगांव, सोनोशी, खेड भैरव, टिटोली, खैरगांव, मांजरगांव, बोर्ली, कुर्णोली, खडकेद, शेनवड बुद्रुक, मानवेढे, बलायदुरी, बारशिंगवे, खंबाळे, कुरुंगवाडी ह्या ग्रामपंचायत आहेत. यांचे आरक्षण अनुसूचित जमातीचे पुरुष किंवा स्त्रिया यांनाच आरक्षित केले जाईल. खालील बिगर अनुसुचीत क्षेत्रातील ग्रामपंचायतींचे आरक्षण तालुक्यासाठी अत्यंत महत्वाचे मानले जाते. यामध्ये शिरसाठे, कुऱ्हेगाव, बेलगांव कुऱ्हे, सांजेगांव, मोडाळे, गोंदे दुमाला, भरविर खुर्द, साकुर, कृष्णनगर, घोटी खुर्द, माणिकखांब, दौंडत, जानोरी, मालुंजे, लक्ष्मीनगर, नांदगांव बुद्रुक, मुकणे, गरुडेश्वर, नांदुरवैद्य, मुरंबी, शेनवड खुर्द, निनावी, वाघेरे, भरविर बुद्रुक, पाडळी देशमुख, वाडीवऱ्हे, मुंढेगांव, पिंपळगांव घाडगा, शेणीत, कावनई, पिपळगांव डुकरा, समनेरे ही गावे समाविष्ट आहेत. इगतपुरी तालुक्यातील संपूर्ण ९६ ग्रामपंचायतींचे आरक्षण काढले गेल्यानंतर लगेच निवडणूक घोषित होण्याची दाट शक्यता आहे.
