इगतपुरीनामा न्यूज – गावनिहाय महसूल फेरफार नोंदी हाताळताना झालेल्या अनियमिततेची गंभीर दखल घेत इगतपुरी तालुक्यातील महसूल विभागातील अधिकारी व कर्मचाऱ्यांवर प्रांताधिकाऱ्यांनी कारवाईचा बडगा उगारला आहे. इगतपुरीचे प्रांताधिकारी पवन दत्ता यांच्या आदेशाने एका मंडळ अधिकाऱ्यासह पाच ग्राम महसूल अधिकाऱ्यांवर (तलाठी) शिस्तभंगाची कारवाई करण्यात आली आहे. या कारवाईमुळे महसूल विभागात खळबळ उडाली असून तालुक्यात या कारवाईची जोरदार चर्चा सुरू आहे. इगतपुरी तालुक्यातील तलाठी व मंडळ अधिकाऱ्यांच्या दफ्तरांची तपासणी करण्यात आली. प्रांताधिकारी पवन दत्ता यांच्या मार्गदर्शनाखाली झालेल्या या तपासणीदरम्यान मुकणे, वाडीवऱ्हे, मुंढेगाव, सांजेगाव आणि गोंदे दुमाला येथील महसूल कामकाजात विविध अनियमितता आढळून आल्या.
फेरफार नोंदी करताना संबंधितांना आवश्यक नोटीस न बजावता कार्यवाही पूर्ण करणे, अधिकार क्षेत्राबाहेर जाऊन फेरफार नोंदी घेणे, आवश्यक कागदपत्रांची तपासणी न करणे तसेच खातेदार व हितसंबंधित व्यक्तींना नोटीस न देता फेरफार नोंदीची कार्यवाही पूर्ण करणे अशा गंभीर त्रुटींचा ठपका संबंधित तलाठ्यांवर ठेवण्यात आला आहे.
वाडीवऱ्हेचे मंडळ अधिकारी बबन कोकाटे यांच्या दफ्तर तपासणीत अधिनस्त तलाठ्यांच्या कामकाजावर आवश्यक नियंत्रण नसल्याचे निदर्शनास आले. तसेच ई-ऑफिसद्वारे नामंजूर झालेल्या फेरफार नोंदींमध्ये संबंधित तलाठ्यांकडून कागदपत्रांची पूर्तता करण्यात कसूर झाल्याचेही तपासणीत समोर आले. या पार्श्वभूमीवर मंडळ अधिकारी कोकाटे यांच्यावरही कारवाई करण्यात आली आहे. प्रांताधिकाऱ्यांच्या आदेशानुसार तीन तलाठ्यांचे निलंबन करण्यात आले असून त्यापैकी एका तलाठ्याविरोधात विभागीय चौकशीचा प्रस्ताव जिल्हाधिकाऱ्यांकडे पाठविण्यात आला आहे. तर उर्वरित दोन तलाठ्यांसह मंडळ अधिकाऱ्याची प्रत्येकी एक वेतनवाढ रोखण्याचे आदेश देण्यात आले आहेत. कारवाई झालेल्यामध्ये वाडीवऱ्हेचे मंडळ अधिकारी बबन कोकाटे, वाडीवऱ्हे तलाठी नितीन केदार, तलाठी गोंदे दुमाला सोमनाथ सांगळे, तलाठी सांजेगाव समीक्षा देव, तलाठी मुंढेगाव मनोज वाकदकर, तलाठी मुकणे पुष्कराज निकम यांचा समावेश आहे. महसूल फेरफार नोंदींच्या कामकाजातील अनियमिततेवर थेट कारवाई झाल्याने इगतपुरी तालुक्यातील महसूल विभागात एकच खळबळ उडाली असून या कारवाईनंतर महसूल कर्मचाऱ्यांच्या कामकाजावर प्रशासनाचे अधिक काटेकोर लक्ष राहणार असल्याचे स्पष्ट झाले आहे.
