इगतपुरीनामा न्यूज – इगतपुरी तालुक्यातील घोटी बुद्रुक येथील दुर्गानगर परिसरातील सुमारे ५० ते ६० कुटुंबांच्या येण्या-जाण्याच्या रस्त्यावरून निर्माण झालेला वाद आता गंभीर स्वरूप धारण करत आहे. अनेक वर्षांपासून वापरात असलेला वहीवाटीचा रस्ता काही व्यक्तींनी खोदून ठेवल्याचा आरोप स्थानिक रहिवाशांनी केला आहे. त्यामुळे परिसरातील नागरिकांसह शाळकरी विद्यार्थ्यांचे दैनंदिन जीवन धोक्यात आले असून, अनेक चिमुकल्यांना जीव मुठीत धरून चिखल व खोदलेल्या मार्गातून शाळेत जावे लागत आहे. या रस्त्याचा पहिला गंभीर फटका दुर्गानगरातील सोनाबाई सहादू कुंदे या आदिवासी वृद्ध महिलेला बसला. त्या आधीपासूनच विविध आजारांवर उपचार घेत असून, मंगळवारी रात्री त्यांची प्रकृती अचानक बिघडली. सामाजिक कार्यकर्त्यांनी तातडीने रुग्णवाहिका बोलावली; मात्र रस्ता खोदून ठेवल्यामुळे रुग्णवाहिकेला घटनास्थळी पोहोचता आले नाही. अखेर परिसरातील युवकांनी प्रसंगावधान राखत झोळी तयार केली आणि भर अंधारात, चिखल व खोदलेल्या मार्गातून वृद्ध महिलेला खांद्यावरून उचलत रुग्णवाहिकेपर्यंत पोहोचवले. या घटनेमुळे नागरिकांमध्ये तीव्र संताप व्यक्त होत आहे. घोटीसारख्या शहरालगतच्या भागात अत्यावश्यक वैद्यकीय सेवेसाठीही नागरिकांना अशा प्रकारे जीव धोक्यात घालावा लागत असल्याने प्रशासनाच्या भूमिकेवर प्रश्नचिन्ह उपस्थित केले जात आहे. संबंधित व्यक्तीने रस्ता खोदून ठेवल्यामुळे भविष्यात उपचाराअभावी कोणाचा मृत्यू झाल्यास संबंधितांवर सदोष मनुष्यवधाचा गुन्हा दाखल करण्यात यावा, अशी मागणी संतप्त नागरिकांनी केली आहे. दरम्यान, दुर्गानगरातील नागरिकांनी हा रस्ता तातडीने खुला करून सुरक्षित वाहतुकीची व्यवस्था करावी, अन्यथा ९ ऑगस्टला तीव्र आंदोलन छेडण्याचा इशाराही दिला आहे.
