इगतपुरीनामा न्यूज – संशयित आरोपी सचिन रामदास तारडे याने फिर्यादी आदिवासी शेतकरी काशिनाथ कमळू झुगरे, वय ६०, रा. वडाचीवाडी त्रिंगलवाडी, ता. इगतपुरी, जि. नाशिक व साक्षीदार यांची ३६ लाख ६३ हजार ६३६ रुपयांची फसवणूक केल्याची फिर्याद इगतपुरी पोलीस ठाण्यात दाखल झाली आहे. काशिनाथ झुगरे यांची त्रिंगलवाडी येथे वडिलोपार्जित गट नं. ३२१ आहे. या गटामध्ये २ हेक्टर ४२.८० आर अधिक पोट खराबा ०० हेक्टर १८.८० असे क्षेत्र आहे. या गटाचे १० ऑक्टोबर २०२५ रोजी फिर्यादी व साक्षीदार यांना कोणतीही माहिती न देता परस्पर कायम फरोक्त खरेदीखत दस्त नं. ४१३२/२०२५ करण्यात आले. मंडळ अधिकारी व तलाठी यांच्या कडून ७/१२ उताऱ्यावर ६ नोव्हेंबर २०२५ रोजी स्वतःचे नांव लावून घेत त्याबाबत फेरफार नोंद नं. ११३३ मंजूर केली. आरोपींनी संगनमत करून फिर्यादी व साक्षीदार यांची ह्या मिळकतीचे वाटप करायचे आहे असे खोटे सांगितले. त्यांच्या संमती शिवाय अडाणीपणाचा फायदा घेतला. फिर्यादीच्या खात्यातून १५ लाख रुपये तसेच २१ लाख ६३ हजार ६३६ रक्कम वेळोवेळी स्वतःच्या खात्यात वर्ग करून त्यांची आर्थिक फसवणूक केली. ५ नोव्हेंबर २०२४ ते ६ नोव्हेंबर २०२५ दरम्यान हा प्रकार घडला. म्हणून काशिनाथ कमळू झुगरे यांच्या फिर्यादीवरून इगतपुरी पोलिसांनी संशयित आरोपी १. सचिन रामदास तारडे रा. घोडे झोप, कोळवाडे, ता. संगमनेर जि. अहिल्यानगर, २. महेंद्र गोपीनाथ सदगीर, रा. तळेगाव, ता. इगतपुरी, ३. हाफिज शेख, ४. कादर शेख ( दोघांचे पूर्ण नाव गाव माहित नाही ) यांच्यावर गु. र. नं. १२६/२०२६ भारतीय न्याय संहिता कलम ३१८, ३३६, ३३८ अन्वये गुन्हा दाखल केला आहे. पोलीस निरीक्षक सारिका अहिरराव यांच्या मार्गदर्शनाखाली तपास सुरु करण्यात आला आहे.
